دۆناڵد ترەمپ، سەرۆکی ویلایەتە یەکگرتووەکانی ئەمریکا، لە لێدوانێکدا بۆ ڕۆژنامەنووسان ئاشکرای کرد کە وڵاتەکەی سێ ستراتیژی جیاوازی لەبەردەستدایە بۆ مامەڵەکردن و ڕووبەڕووبوونەوە لەگەڵ ئێران.
ئاوێنە: بەپێی وتەکانی ترەمپ، بژاردەی یەکەم بریتییە لە چاودێریکردنی ئاستی خراپبوونی دۆخەکە، لەکاتێکدا بژاردەی دووەم خۆی لە ئاڕاستەکردنی لێدانی بەهێز و توند بۆ سەر ئێران دەبینێتەوە. سەبارەت بە بژاردەی سێیەم، سەرۆکی ئەمریکا ئاماژەی بەوە دا کە بریتییە لە پیادەکردنی گوشاری ئابووری، ڕوونیشی کردەوە کە لە ئێستادا واشنتۆن کار بەم ستراتیژییە ئابوورییە دەکات بۆ دروستکردنی گوشار لەسەر تاران.
ئەم ڕاگەیاندنەی سەرۆکی ئەمریکا لە کاتێکدایە کە هەردوو وڵات بە شێوازێکی ناڕاستەوخۆ لە پرۆسەی دانوستانداندن. لەو چوارچێوەیەدا، تاران لە ڕێگەی تێپەڕاندنی کەناڵە دبلۆماسییەکان لەگەڵ سەڵتەنەتی عومان لە هێڵدایە، و سەرجەم هەوڵە دبلۆماسییەکان ئاڕاستەی ڕاگرتنی ئاڵۆزییە سەربازییەکان و مسۆگەرکردنی کراوەیی و ئاسایشی دەریایی لە گەرووی هورمزدا دەکرێن.