یۆسی کۆهین، سەرۆکی پێشووی مۆساد دەڵێت "بۆ تێگەیشتن لەو شوێنە زۆرجار گەشتمان بۆ شوێنی ئەتۆمی فۆردۆ لەئێران کردووە".
ئاوێنە: یۆسی کۆهین، سەرۆکی پێشووی مۆساد ئەمڕۆ (سێشەممە) ڕایگەیاند، ئیسرائیل چەندین جار "گەشتی"ی بۆ شوێنی ئەتۆمی ئێران لە فۆردۆ کردووە، کە تاران بەشێک لە کۆگاکانی یۆرانیۆمی پیتێنراوی تێدا هەڵگرتووە.
ئاماژەی بەوەش کردووە، بۆردومانکردنی ئەو دامەزراوەیە لەلایەن سوپای ئەمریکاوە لە مانگی حوزەیرانی ساڵی ڕابردوودا "بەدیهێنانی هەموو خەونەکانی بووە".
بە گوتەی کۆهین، یۆرانیۆمی پیتێنراو تا ئاستی ٦٠% "هێشتا دوورە لەبەرهەمهێنانی بۆمبی ئەتۆمی".
دامەزراوەی فۆردۆ لە مانگی حوزەیرانی ساڵی ڕابردوودا لە کاتی شەڕی ئێران لەلایەن ئەمریکییەکانەوە بۆردومان کرا. دۆناڵد ترەمپ، سەرۆکی ئەمریکا لەو کاتەدا بانگەشەی ئەوەی کردبوو کە "دامەزراوە سەرەکییە ئەتۆمییەکانی ئێران بە تەواوی لەناوچوون". بەڵام بەرپرسێکی باڵای ئەمریکی لە گفتوگۆیەکدا لەگەڵ ڕۆژنامەی نیویۆرک تایمز ڕوونی کردەوە کە بۆردومانەکانی ئەو دامەزراوە ژێرزەمینییە زیانێکی زۆری پێگەیاندووە، بەڵام لەناوی نەبردووە. بەرپرسێکی ئێرانی لە وتووێژێکدا لەگەڵ ئاژانسی هەواڵی ڕۆیتەرز ئیدیعای کرد کە زۆربەی یۆرانیۆمی پیتێنراوی بنکەی ئەتۆمی فۆردۆ پێش هێرشی ئەمریکا بۆ شوێنێکی نهێنی گواستراوەتەوە.