لە پەرەسەندنێکی نوێی پەیوەندییەکانی نێوان واشنتن و تەلئەبیبدا، ماڵپەڕی ئاکسیۆسی ئەمریکی لە زاری چەند بەرپرسێکی باڵاوە ئاشکرای کرد، کە دۆناڵد ترەمپ بێزاری و بێهیواییەکی توندی بەرامبەر بڕیار و سیاسەتەکانی ئەم دواییەی بنیامین نەتانیاهۆ نیشانداوە، تا ئەو ڕادەیەی لە بازنەی نزیکەکانی خۆیدا نەتانیاهۆی وەک «گەورەترین دوژمنی خۆی» وەسف کردووە.
ئاوێنە: سەرەڕای ئەوەی لە سەرەتای شەڕ و گرژییەکاندا ڕاوێژکارانی ترەمپ چاوەڕوانی پشتیوانییەکی ڕەهای ناوبراویان بۆ نەتانیاهۆ لە هەڵبژاردنەکاندا دەکرد، بەڵام هاوکێشەکان بە ئاراستەیەکی پێچەوانەدا شکاونەتەوە.
ئاکسیۆس ئاماژەی بەوە کردووە کە گۆڕانی ڕێڕەوی شەڕ و دەرکەوتنی جیاوازیی قووڵ لە ئەولەویەتە سیاسییەکاندا، هۆکاری سەرەکیی ئەم پاشەکشێیەی ترەمپە، کەلێنی نێوان هەردوولا بە تایبەت لەسەر دۆسییە هەستیارەکانی پەیوەست بە ئێران، بەرەی لوبنان، و دۆخی کەرتی غەززە گەیشتووەتە ئاستێکی نوێی ناکۆکی.