ڕۆژی شەممە، ئەدمیراڵ براد کووپەر، فەرماندەی فەرماندەییی ناوەندیی ئەمریکا (سێنتکۆم)، سەردانی کەشتیی فڕۆکەهەڵگری «ئەبراهام لینکۆڵن»ی کرد، ئەمەش لە کاتێکدایە کە کەشتییەکە ئامادەکاری دەکات بۆ گەڕانەوەی بۆ ویلایەتە یەکگرتووەکانی ئەمریکا، دوای تەواوکردنی ئەرکێکی سەربازیی نزیکەی نۆ مانگی کە لە درێژایی ئەو ماوەیەدا لە هیچ بەندەرێکدا لەنگەری نەگرتووە، بەپێی ئەوەی سێنتکۆم ڕایگەیاندووە.

ئاوێنە: بەپێی ڕاپۆرتێکی ڕۆژنامەی «وۆڵ ستریت جۆرناڵ»، ئەم سەردانە هاوکاتە لەگەڵ بڵاوبوونەوەی چەندین ڕاپۆرت سەبارەت بە خراپبوونی دۆخی گوزەران لەسەر کەشتییەکە؛ لەوانە کەمیی خۆراکی فرێش و پێداویستییە سەرەتاییەکان، گیرانی تۆڕی دابەشکردنی ئاو، و سەرهەڵدانی کێشەی تەندروستیی دەروونی لەنێو سەربازاندا.

بەرپرسێکی ئەمریکی پشتڕاستی کردەوە کە لە سەرەتای مانگی ئابدا ئەندامێکی دەستەی کەشتییەکە لەسەر تەختەی کەشتییەکەوە کەوتووەتە ناو دەریاوە، بەڵام توانراوە دەستبەجێ ڕزگار بکرێت.

بەرپرسانی ئەمریکی ئاماژە بەوە دەکەن کە ئەم جۆرە بارودۆخانە لە ئۆپەراسیۆنە سەربازییە درێژخایەنەکاندا شتێکی نامۆ نین، بەڵام لە هەمان کاتدا دان بەوەدا دەنێن کە مانەوە بۆ چەندین مانگ بەبێ وەستان لە بەندەرەکان، بارگرانییەکی دەروونی و جەستەیی قورس دەخاتە سەر شانی دەریەوانان و سەربازانی هێزی دەریایی.

لە دۆخی ئاساییدا، کەشتییە فڕۆکەهەڵگرەکان لە بەندەرەکاندا لەنگەر دەگرن بە مەبەستی پڕکردنەوەی پێداویستییەکان و پێدانی دەرفەت بە تیمی کەشتییەکە بۆ پشوودان و خۆڕێکخستنەوە بۆ ماوەی چەند ڕۆژێک؛ ئەو کارەی کە کەشتیی «ئەبراهام لینکۆڵن» لە دوای هەڵگیرسانی جەنگ لەگەڵ ئێران نەیتوانیوە ئەنجامی بدات.

هۆنگ کاو، بەڕێوەبەری کارەکانی وەزارەتی هێزی دەریایی ڕایگەیاند کە «ژمارەیەکی کەم لە کێشە دەروونییەکان چارەسەر کراون بەبێ ئەوەی هیچ حاڵەتێکی گیانلەدەستدان تۆمار بکرێت».

کاو ئەوەشی خستەڕوو کە لە کاتی بەرزبوونەوەی مەترسییە ئۆپەراسیۆنییەکان، پەیوەندییە تەلەفۆنییەکانی سەربازان سنووردار کراون، هەروەها بەرنامەی ژەمە خۆراکییەکان دەستکارییان تێدا کراوە لە کاتی کەمبوونەوەی کەلوپەلدا، بەڵام هیچ ژەمێکی خۆراک فەرامۆش نەکراوە.

کەشتییەکە ڕۆڵێکی یەکلاکەرەوەی هەبووە لە ئۆپەراسیۆنە سەربازییەکانی ئەمریکا لە دژی ئێران و بەشدار بووە لەو ئابڵۆقەیەی کە دۆناڵد ترەمپ، سەرۆکی ئەمریکا بەسەر بەندەرەکانی ئێراندا سەپاندوویەتی. کەشتییەکە زیاتر لە ٢٠٠ ڕۆژی لە ناوچەی ئۆپەراسیۆنەکاندا بەسەر بردووە و زیاتر لە ١٠ هەزار فڕینی جەنگیی ئەنجام داوە.

کووپەر ئەرکی ئەم کەشتییەی وەک یەکێک لە چڕترین و کاریگەرترین ئۆپەراسیۆنە سەربازییەکانی سەردەمی نوێ وەسف کرد و وتی: «تیمی هێرشبەری کەشتیی لینکۆڵن لە کۆمەڵێک سەربازی ئەمریکیی لێهاتوو پێکهاتووە کە بە شانازییەکی گەورە و شایستەوە بە هەموو ئەو دەستکەوتانەی تۆماریان کردووە، ڕاوەستاون».

لە بەرامبەردا، ئەندامانی دیموکرات لە ئەنجومەنی پیران داوای ڕوونکردنەوەیان لە پیت هێگسێس، وەزیری جەنگ کرد سەبارەت بە دۆخی ناو کەشتییەکە، و هۆشدارییان دا لەوەی کە «بەڵگەی ڕوو لە زیادبوون هەن کە دەریدەخەن دۆخی ناو کەشتییەکە گەیشتووەتە ئاستێک کە سەلامەتی و ژیانی تیمی کەشتییەکە بخاتە مەترسییەوە».

لەلای خۆیەوە، هێگسێس بە توندی ڕەخنەی لەو ڕاپۆرتانە گرت کە باس لە خراپیی دۆخەکە دەکەن و ڕایگەیاند کە «تەواوی ڕاستییەکان شێوێندراون»، لە کاتێکدا ترەمپ نایەکسانی و نیگەرانییەکانی سەبارەت بە درێژەی ماوەی ئەرکی کەشتییەکە کەمکردەوە و ڕایگەیاند کە ماوەی ئەرکەکەی «هێندەش درێژ نەبووە».

سەردانەکەی کووپەر هاوکاتە لەگەڵ بەردەوامیی گەمارۆ دەریاییەکەی ئەمریکا بۆ سەر بەندەرەکانی ئێران، ئەمەش لە چوارچێوەی هەوڵەکانی واشنتۆن بۆ درێژەدان بە گوشارە ئابوورییەکانی سەر تاران. هاوکات هێگسێس ڕایگەیاند کە گەمارۆکە دەکرێت «بۆ ماوەیەکی نادیار» بەردەوام بێت و زیادی کرد: «تا ئەو کاتەی پێویستمان پێی بێت، لەسەری بەردەوام دەبین».