فەرماندەیی گشتیی هێزە چەکدارەکانی ئێران هۆشداری دەداتە ویلایەتە یەکگرتووەکانی ئەمریکا و ڕایدەگەیەنێت هەر هەڕەشەیەکی نوێ بە وەڵامێکی "وێرانکەر" ڕووبەڕوو دەبێتەوە. ئەم پەیامە توندەی تاران لە کاتێکدایە کە واشنتۆن بڕیاری سەپاندنی توندترین سزای دارایی بە مەبەستی ڕووخاندنی دەسەڵاتی کۆماری ئیسلامی دەرکردووە.
ئاوێنە: سکۆت بێسێنت، وەزیری گەنجینەی ئەمریکا ڕۆژی پێنجشەممە رایگەیاند کە وڵاتەکەی سزای دارایی زۆر توند بەسەر ئێراندا دەسەپێنێت و بڕیارە رۆژی دووشەممە تەواوی وردەکاریی ئەو ڕێکارە نوێیانە بۆ ڕای گشتی ئاشکرا بکرێن.
هاوکات دۆناڵد ترەمپ، سەرۆککۆماری ئەمریکا، تارانى بە "جەنگی ئابووری" هەڕەشە لێکرد و ڕایگەیاند، ئابووریی هەر وڵاتێک کە هەر جۆرە هاوکاری و پشتیوانییەک پێشکەش بە ئێران بکات، رووبەڕووی لێکەوتە و سزای قورس دەبێتەوە.
لە بەرامبەردا، ئاژانسی هەواڵی "ئیسنا"ی ئێرانی بڵاویکردەوە کە عەلی عەبدوڵڵاهی، سەرۆکی ئەرکانی گشتیی هێزە چەکدارەکانی ئێران کە هاوکات فەرماندەی "بنکەی ناوەندیی خاتەمولئەنبیا"ی سەر بە سوپای پاسدارانە، ڕایگەیاندووە هێزەکانیان لە تەواوی بوارەکانی وشکانی، دەریایی، ئاسمانی، بەرگری، ئاسمانیی دوور (فەزا) و سایبەریدا لە ئامادەباشیی تەواودان. ناوبراو هۆشداریی داوە کە هەر هەڵەیەکی لێکدانەوە و هەڕەشەیەکی تەقلیدی یاخود نوێ لەلایەن نەیارەکانیانەوە، بە وەڵامی شۆڕشگێڕانە، کوشندە، پەشیمانکەرەوە و وێرانکەر بەرپەرچ دەدرێتەوە.
لەلایەکی دیکەوە و لەسەر ئاستی سیاسی، محەمەد باقر قالیباف، سەرۆکی پەرلەمانی ئێران و دانوستانکاری سەرەکیی تاران لە گفتوگۆکانی لەگەڵ ئەمریکا، ڕۆژی هەینی لە میانی سەردانەکەیدا بۆ عێراق ئاماژەی بەوە کرد پێویستە وڵاتەکەی پلانی تۆکمە بۆ ڕووبەڕووبوونەوەی "سزا ستەمکارانەکان" دابڕێژێت. قالیباف هەریەکە لە واشنتۆن و ئیسرائیلی تۆمەتبار کرد بەوەی کە "جەنگی ئابووری" و "جەنگی دەروونی و مەعریفی"یان دژ بە ئێران بەرپا کردووە.
لە نێوەندی ئەم پەرەسەندنە توندانەدا، مەسعوود پزیشکیان، سەرۆککۆماری ئێران هەڵوێستێکی جیاوازی نیشاندا و داوای کرد بە زووترین کات کۆتایی بە جەنگ و گرژییەکانی نێوان تاران و ویلایەتە یەکگرتووەکانی ئەمریکا بهێنرێت.