ئەمرۆ هەینی، ئاکین گورلیک، وەزیری دادی تورکیا، ڕاگەیاند کە تورکیا فەرمانی دەستگیرکردنی نێودەوڵەتی بۆ بنیامین نەتنیاهۆ، سەرۆک وەزیرانی ئیسرائیل، دەرکردووە. بڕیارەکە لە چوارچێوەی بەدواداچوون و لێکۆڵینەوە فراوانەکانی تایبەت بە ڕێگریکردن لە کەشتییەکی فریاگوزاری سەر بە "فلۆتیلای خۆڕاگری جیهانی" دێت، کە ئامانجی سەرەکی شکاندنی گەمارۆی سەر کەرتی غەززە بوو.

ئاوێنە: ئەم ئۆپەراسیۆنە دەریاییە گەورەیە کە لە کۆتایی هاوینی ساڵی 2025 لە وڵاتانی ئیسپانیا و تونسەوە بەڕێکەوتبوو، پێک هاتبوو لە چەندین کەشتی و چالاکوانی نێودەوڵەتی بۆ گەیاندنی هاوکاری مرۆیی، بەڵام لەلایەن هێزەکانی ئیسرائیلەوە ڕێگری لێکرا و رێگەی پێنەدرا بگاتە ئامانجەکەی.

لەلایەکی دیکەوە، دەسەڵاتی دادوەری تورکیا پێشتر لە مانگی تشرینی دووەمی 2025یشدا بڕیاری هاوشێوەی دەرکردبوو. داواکاری گشتیی ئیستانبوڵ لە ڕاگەیەندراوێکدا ڕوونیشکردەوە کە فەرمانی دەستگیرکردنەکە لە بنەڕەتدا 37 تۆمەتباری جیهانی و ناوخۆیی ئیسرائیل، لەوانە ئیسرائیل کاتز، وەزیری بەرگری، و ئیتامار بن گڤیر، وەزیری ئاسایشی نیشتمانی، دەکاتە ئامانج بە تۆمەتی ئەنجامدانی جینۆساید و تاوانی دژ بە مرۆڤایەتی.

سەبارەت بە پاشخانی لێکۆڵینەوەکان، دادگا چەندین دۆسیەی تاوانکاری و پێشێلکاری قورسی وەک بەشێک لە بەڵگەکان خستووەتەڕوو؛ لەوانە کوشتنی منداڵی شەش ساڵان هیند ڕەجەب لە مانگی کانوونی دووەمی 2024، هێرشکردنە سەر نەخۆشخانەی باپتیستی ئەلئەهلی لە تشرینی یەکەمی 2023 کە بووە هۆی قوربانییەکی زۆر، تێکدانی بەئەنقەستی ئامێرە پزیشکییەکان لە شوباتی 2024، هەروەها بۆردومانی نەخۆشخانەی دۆستایەتی تورکیا و فەڵەستین لە ئازاری 2025. لایەنی تورکی جەخت لەوە دەکاتەوە کە ئیسرائیل بە بەردەوامی ژێرخانی تەندروستی و دامەزراوە فەڵەستینییەکانی کردووەتە ئامانج و ڕێگری لە گەیشتنی هاوکارییەکان کردووە.