محەمەد باقر قالیباف، سه‌رۆكی په‌رله‌مانی ئێران رایده‌گه‌یه‌نێت، وڵاته‌كه‌ی پشتیوانی له هەر رێككەوتنێكی نێوان حكومەتی عێراق و گروپە چه‌كداره‌كان ده‌كات و ده‌شڵێت: لەگەڵ بەرپرسانی عێراق تاوتوێی رێككەوتنی ئەمنی نێوان هه‌ردو وڵات و ئاسایشی سنورەكانی نێوانیان كردوە.
ئاوێنه: محەمەد باقر قالیباف، سەرۆکی پەرلەمانی ئێران، به میدیای وڵاته‌كه‌ی راگەیاند، ئێران دەستوەردان ناکات لە کاروباری ناوخۆی عێراقداو پشتگیری لە هەر رێککەوتنێک دەکات کە لایەنە عێراقییەکان لەگەڵ حکومەتی عێراق لە چوارچێوەی دەستوردا ئەنجامیدەدەن، بە شێوەیەک کە سەربەخۆیی و سەروەری عێراق بپارێزێت.
وتیشی، کەشوهەوای دانوستانەکانی لەگەڵ بەرپرسانی باڵای عێراق برایانە و گەرموگوڕ بوە.
قالیباف ئاماژه‌ی به‌وه‌داوه كه كشانەوەی هێزە بیانییەكان لە عێراق هەنگاوێکی گرنگ و بنەڕەتییەو سەردانەکەی دەرفەتێکی گونجاو بوە بۆ تاوتوێکردنی پرسی ئاسایش، سیاسی، ئابوری و کلتوریی.
سەرۆکی پەرلەمانی ئێران راشیگەیاندوە، بەشێک لە دانوستانەکانی لە عێراق تایبەت بوە بە پرسەكانی ئاسایش و پێشتر رێککەوتنێکی ئەمنی لە نێوان ئێران و عێراق لە بواری ئاسایش و ئاسایشی سنورەکاندا ئیمزا کراوە، بەدواداچونەکان لەسەر جێبەجێکردنی چڕ ببونەوە.
قالیباف له‌باره‌ی پرسی گروپه چه‌كداره عێراقییه‌كانه‌وه وتی، راشكاوانە رونی دەکەمەوە، ئێمە بە هیچ شێوەیەک دەستوەردان لە کاروباری ناوخۆی عێراقدا ناکەین، هەر رێککەوتنێک کە گروپەكان و بەرپرسانی عێراق لە چوارچێوەی دەستوری وڵاتەکەیاندا پێی دەگەن بۆ پاراستنی سەربەخۆیی و سەروەری و دەسەڵاتیان و کۆدەنگی لەسەر بێت، ئێران پشتیوانی لێ دەکات.