پارتی ئایندە کە لەساڵی ٢٠١٩ لەلایەن ئەحمەد داودئۆغڵو دامەزراوە، بەدەنگی نوێنەرانی کۆنگرەی پارتەکە هەڵوەشاندنەوەی خۆی راگەیاند.

ئاوێنە: پارتی ئایندە کە لە ساڵی ٢٠١٩ لەلایەن ئەحمەد داودئۆغڵوەوە بە بانگەشەی "ناوەندێکی نوێی چاکسازیخوازی" دامەزراوە، لەڕاگەیاندراوێکدا  ئەمڕۆ ٢٢ی ئاب بەفەرمی کۆتایی بەچالاکییە سیاسییەکانی هێناو سەرکردایەتی پارتەکە ڕایگەیاند کە بڕیارەکە "تەسلیمبوون نییە، بەڵکو ئیرادەیە بۆ پاراستنی بناغەی ئەخلاقی سیاسەت".

لە ڕاگەیەندراوەکەدا جەخت لەوە کراوەتەوە کە بڕیارەکە بە مانای وازهێنان لە خەباتی سیاسی نییەە دەڵێت "لە کۆنگرەی هەڵوەشاندنەوەمان کە لە ٢٢ی ئابی ٢٠٢٦ (ئەمڕۆ) بەڕێوەچوو، بە فەرمی بڕیارماندا، لەڕێگەی دەنگدانێکەوە بە بەشداری نوێنەرانمان، کۆتایی بە چالاکییە سیاسییەکانی پارتی ئایندە بهێنین و هەڵیبوەشێنینەوە، هەروەک چۆن بە دڵسۆزی و کەرامەت و حەماسەتێکی زۆرەوە پارتی ئایندەمان دامەزراند، ئەمڕۆش بە هەمان دڵسۆزی و کەرامەت و عەقڵی ساغ و ئیرادە و شەرەفەوە دایدەخەین. ئەو بڕیارەی ئێمە ئەمڕۆ کردوومانە تەسلیمبوون نییە".

بڕیاری پارتی ئایندە بۆ کۆتایی هێنان بە چالاکییە سیاسییەکانی لە مانگی تەمموزی ٢٠٢٦ لەلایەن ئەحمەد داودئۆغڵوەوە بۆ ڕای گشتی ڕاگەیەندرا.

لە 29ی تەمموزدا، داودئۆغڵو لە هەژماری تایبەتی خۆی لە سۆشیال میدیا ڕایگەیاند، سیاسەت تا دێت گەندەڵتر دەبێت، هەروەها دوابەدوای هەڵسەنگاندن لەگەڵ ئۆرگانەکانی حزب، بڕیاریان داوە پارتی ئایندە هەڵبوەشێننەوە بۆ ئەوەی نەبنە بەشێک لەم پرۆسەیە.

داودئۆغڵو لە بەیاننامەکەیدا باسی لەوە کرد کە تۆمەتەکانی گەندەڵی لە حکوومەتی ناوەندی و خۆجێی دەریخست کە کێشەکە تەنیا لە یەک کەسایەتی سیاسیدا سنووردار نەبووە، بەڵکو تەشەنەی سەندووە بۆ تەواوی سیستەمی سیاسی.

داودئۆغڵو ئاماژەی بەوەدا کە گواستنەوەی پەرلەمانتاران و سەرۆک شارەوانییەکان و هەروەها دانانی ئەمیندارەکان بووەتە بەشێکی ئاسایی لە سیاسەتی ڕۆژانەدا و ئاماژەی بەوەدا کە ئەمە ئیرادەی دەنگدەران لاواز دەکات وەک ئەوەی لە سندوقی دەنگداندا دەربڕدراوە.

لە هەڵبژاردنە گشتییەکاندا کە لە ١٤ی ئایاری ٢٠٢٣ بەڕێوەچوو، جەهەپە‌و هاوپەیمانەکانی ١٦٩ کورسی پەرلەمانیان بەدەستهێنا.

 ٣٨ کەس لە پارتی فێلیسیتی، پارتی دیڤا، پارتی ئایندە لەڕێگەی لیستەکانی جەهەپە بۆ ئەنجومەنی نیشتمانیی گەورەی تورکیا هەڵبژێردران.

لەم چوارچێوەیەشدا پارتی دیڤا بە ١٥ جێگرەوە نوێنەرایەتی لە پەرلەماندا هەبوو، پارتی فێلیسیتی و پارتی ئایندە هەریەکەیان ١٠ جێگریان هەبوو.

دوابەدوای هەڵبژاردنەکان، پارتی ئایندە، پارتی فێلیسیتی و پارتی دیڤا لە ژێر چەتری "فراکسیۆنی ڕێگای نوێ"دا کۆبوونەوە.