لە كاردانەوەیەکدا بەرامبەر بەو شەپۆلە ڕەخنە کێبڕکێکارانەی کە لەلایەن بەرپرسانی ئیسرائیل و ئەندامانی کۆماری لە ئەمریکا ئاراستەی کرابوون، تۆم باراک، نێردەی تایبەتی ئەمریکا لە سوریا، پاشەکشەی کرد لەو لێدوانانەی کە چەند ڕۆژێک پێشتر سەبارەت بە بەرزاییەکانی جۆلانی داگیرکراو خستبوویەڕوو.
ئاوێنە: لە بەیاننامەیەکدا کە ئاژانسی ئەسۆشێتد پرێس بڵاوی کردووەتەوە، باراک ڕونی کردەوە کە لێدوانە پێشووەکانی تەنها بۆ وەسفکردنی دۆخی مێژوویی ناوچەکە بوون و هیچ ئاراستەیەکی نەبووە بۆ کشانەوە لە پشتگیریکردنی ئەو هەڵوێستەی کە لە ساڵی ٢٠١٩وە لەلایەن سەرۆک دۆناڵد ترەمپەوە بۆ جۆلان دانراوە. ناوبراو جەختی لەوە کردەوە کە سیاسەتی ئەمریکا لەم بارەیەوە هیچ گۆڕانکارییەکی بەسەردا نەهاتووە.
ئەم ڕونکردنەوەیەی نێردەی ئەمریکا دوای ئەوە هات کە ناوبراو پێشتر لە پۆدکاستێکدا هۆشداری دابوو لە ئەگەری دروستکردنی پێکدادان لە نێوان ئیسرائیل و تورکیا لە باکووری سوریا، بەتایبەت دوای ئەو هێرشانەی کە لە ۱۸ی ئاب ڕووی داون، و ئەو دۆخەی بە "یارییەکی مەترسیدار" وەسف کردبوو کە ڕەنگە هاوشێوەی ڕووداوی خستنەخوارەوەی فڕۆکە ڕووسییەکان لەلایەن تورکیاوە لێ بکەوێتەوە؛ هاوکات ئاماژەی بەوەش کردبوو کە ئیسرائیل بەردەوامە لە داگیرکردنی ناوچەکە بە پێشێلکردنی بڕیارنامەکانی نەتەوە یەکگرتووەکان.
جێی باسە، بەرزاییەکانی جۆلان لە جەنگی ساڵی ۱۹۶۷دا لەلایەن ئیسرائیلەوە کۆنترۆڵ کران و لە ساڵی ۱۹۸۱شدا بڕیاری لکاندنی بە خاکی خۆیەوە درا، بەڵام تا ئێستاش کۆمەڵگەی نێودەوڵەتی و نەتەوە یەکگرتووەکان ئەو ناوچەیە بە خاکی داگیرکراوی سوریا دەناسێنن و دانیان بەو لکاندنەدا نەناوە.