وەزارەتی بەرگریی ویلایەتە یەکگرتووەکانی ئەمریکا جەختی لە بەردەوامیی بژاردەی بەکارهێنانی هێزی سەربازی بەرامبەر ئێران کردەوە، ئەمەش لە کاتێکدایە کە واشنتۆن ڕێوشوێنی ئابووریی نوێی بەرامبەر تاران گرتووەتەبەر.
ئاوێنە: لە میانی کۆنگرەیەکی ڕۆژنامەوانیدا، پێت هیگسیت، وەزیری بەرگریی ئەمریکا، هەڵوێستی فەرمیی ئیدارەی وڵاتەکەی خستەڕوو و رایگەیاند کە واشنتۆن دوودڵ نابێت لە گرتنەبەری بژاردەی سەربازی دژ بە ئێران و ئەو ئەگەرە هێشتا وەک بژاردەیەکی سەرەکی لەسەر مێزی گفتوگۆ و بڕیارەکان دەمێنێتەوە.
وەزیری بەرگریی ئەمریکا لە وتەکانیدا تیشکی خستە سەر دۆخی دارایی ئێران و ئاماژەی بەوە کرد کە بە بڕوای ئەوان تاران توانای بەرگەگرتنی ئەو گوشارە ئابوورییە چڕ و قورسەی نییە کە لەلایەن ئەمریکاوە خراوەتە سەری.
ئەم پەیام و لێدوانە سەربازییانەی پێنتاگۆن هاوکاتن لەگەڵ هەنگاوێکی وەزارەتی گەنجینەی ئەمریکا بۆ سەپاندنی پاکێجێکی دیکەی گەمارۆ و سزای ئابووری بەسەر تاراندا، کە ئامانج لێی زیاتر تەسککردنەوەی جووڵەی کەرتی دارایی و سنووردارکردنی سیاسەتەکانی کۆماری ئیسلامیی ئێرانە لە ناوچەکەدا.