دەستەی ئۆپەراسیۆنە بازرگانییە دەریاییەکانی بەریتانیا (UKMTO) ئەمڕۆ پێنجشەممە ڕایگەیاند، کەشتییەکی نەوتهەڵگر لە گەرووی هورمز بە "مەقزوفێکی نەزانراو" پێکراوە و بەهۆیەوە ئاگر لەسەر پشتی کەشتییەکە کەوتووەتەوە، بەڵام دواتر توانراوە ئاگرەکە کۆنترۆڵ و بکوژێنرێتەوە.
ئاوێنە: دەستە بەریتانییەکە لە ڕاگەیەندراوێکدا پشتڕاستی کردەوە کە سەرجەم ئەندامانی تیمی کەشتییەکە سەلامەتن و هیچ زیانێکی گیانی تۆمار نەکراوە. هاوکات بە پێچەوانەی ڕاپۆرتەکانی پێشووتری، ئەمجارە دەستەکە شوێنی ورد و دیاریکراوی کەوتنەوەی ڕووداوەکەی ئاشکرا نەکردووە.
ئەم ڕووداوە دوای ئەوە دێت کە ڕۆژی دووشەممەی ڕابردووش دەستەی ناوبراو لە هێرشێکی هاوشێوە بۆ سەر کەشتییەکی دیکە لە نزیک کەناراوەکانی عومان هەواڵی دابوو.
ڕێڕەوی دەریایی گەرووی هورمز لە دوای ٢٨ی شوباتی ڕابردووەوە، بەهۆی هەڵگیرسانی جەنگی ئەمریکا و ئیسرائیل دژ بە ئێران و ڕاگەیاندنی داخستنی ئەم گەرووە لەلایەن تارانەوە، بەردەوام رووبەڕووی هێرش و بەئامانجگرتنی کەشتییە بازرگانی و نەوتهەڵگرەکان دەبێتەوە.
لە ڕووی گوتاری سەربازی و سیاسییەوە، لایەنە ناکۆکەکان گێڕانەوەی پێچەوانە دەخەنە ڕوو:
هەڵوێستی تاران: حسێن موحەیبی، وتەبێژی سوپای پاسدارانی ئێران ڕۆژی چوارشەممە ڕایگەیاند کە تەواوی ئەم ڕێڕەوە دەریاییە لەژێر کۆنترۆڵی تاران دایە و جەختی کردەوە کە هیچ "کەشتییەکی سەربازیی دوژمن لەناو ئاوەکانی کەنداودا بوونی نییە".
هەڵوێستی واشنتن: لە بەرامبەردا، دۆناڵد ترەمپ، سەرۆکی ئەمریکا بەردەوام جەخت لەوە دەکاتەوە کە هێزەکانی وڵاتەکەی گەمارۆیەکی دەریایی توندیان بەسەر بەندەرەکانی ئێراندا سەپاندووە و گەرووی هورمز لەژێر کۆنترۆڵی هێزەکانی ئەمریکادایە.