حکومەتی عێراق وادەی فەرمیی کۆتاییهاتنی ئەرکی سەربازیی هاوپەیمانیی نێودەوڵەتی لە وڵاتەکەدا دیاری کرد و جەختی لەسەر کشانەوەی سەرجەم یەکە سەربازی و سیستمی بەرگرییەکان کردەوە.
قاسم ئەعرەجی، ڕاوێژکاری ئەمنیی سەرۆک وەزیرانی عێراق ئاشکرای کرد، پرۆسەی دەرچوونی هێزەکانی هاوپەیمانیی نێودەوڵەتی لە سەرتاسەری عێراق تاوەکو 30ی ئەیلوول، واتە کۆتایی ئەم مانگە، بە تەواوەتی جێبەجێ دەکرێت. بەگوێرەی لێدوانەکانی ناوبراو، بڕیاری کشانەوەکە گشتگیرە و سەرجەم پێگە سەربازییەکان و سیستمی بەرگریی ئاسمانی دەگرێتەوە، بەوانەشەوە کە لە سنووری هەرێمی کوردستان جێگیر کراون.
ئەعرەجی ئاماژەی بەوەش دا، ئەم هەنگاوە دەرئەنجامی پابەندبوونە بەو ڕێککەوتنەی پێشتر لە نێوان حکومەتی پێشوو و هاوپەیمانیی نێودەوڵەتیدا واژۆ کراوە، هاوکات باسی لەوەش کرد کە لایەنی ئەمریکی ئامادەیی تەواوی دەربڕیوە تا لە وادەی دیاریکراودا هێزەکانی بکشێنێتەوە.
لە بەشێکی دیکەی قسەکانیدا سەبارەت بە پرسی چەکی گروپە چەکدارەکان و ئەو لایەنانەی کە مەرجیان بۆ ڕادەستکردنی چەکەکانیان دیاری کردووە، ڕاوێژکاری ئەمنیی سەرۆک وەزیران ڕوونی کردەوە، دۆسیەی کۆنترۆڵکردن و ڕێکخستنەوەی چەک لە وڵاتدا دەکەوێتە دوای تەواوبوونی پرۆسەی کشانەوەی تەواوەتیی هێزەکانی هاوپەیمانان لە خاکی عێراق، و لەو قۆناغەدا بە فەرمی تاوتوێ دەکرێت.