موحسین ڕەزایی، ئەمینداری ئەنجومەنی ئاسایشی نەتەوەیی ئێران، لە نوێترین لێدوانیدا هەڵوێستی وڵاتەکەی سەبارەت بە قەیرانی گەرووی هورمز و گەڕانەوە بۆ مێزی دانوستانەکان ڕاگەیاند. ناوبراو جەختی لەوە کردەوە کە تاران بە هیچ شێوەیەک دەست بە دانوستان ناکاتەوە و گەرووی هورمزیش بە داخراوی دەمێنێتەوە، تا ئەو کاتەی هەر حەوت مەرجەکەیان بە تەواوی جێبەجێ نەکرێن.
سەبارەت بە هۆکاری جێبەجێنەکردنی ڕێککەوتنەکانی پێشوو، ڕەزایی ئاماژەی بەوە دا کە شکستی یاداشتی لێکتێگەیشتنی پێشوو دەگەڕێتەوە بۆ هەڵە لە ڕیزبەندیی جێبەجێکردنی پابەندبوونەکان. بۆیە ئەمجارە جەخت دەکەنەوە کە ڕیزبەندیی قۆناغەکان ڕوونە و دەبێت سەرەتا مەرجەکانی ئێران بخرێنە بواری جێبەجێکردنەوە.
لەلایەکی دیکەوە، بەرپرسە باڵاکەی ئێران تێڕوانینی وڵاتەکەی بۆ گەرووی هورمز گۆڕیوە و ڕایگەیاند کە پرسی گەروویی هورمز تەنیا خاڵێکی ناو ڕێککەوتنەکە نییە، بەڵکو وەکو بەشێک لە گەرەنتیی جێبەجێکردنی تەواوی ڕێککەوتنەکە سەیر دەکرێت.
لە درێژەی لێدوانەکانیدا، موحسین ڕەزایی بێمتمانەیی تارانی بە بەڵێنە زارەکییەکان نیشان دا و ڕایگەیاند کە چیتر گرنگی بەو ڕێککەوتنانە نادەن کە تەنیا پشت بە "نیازپاکی سیاسی" دەبەستن وەک تاکە گەرەنتی.
لە کۆتاییدا، ئەمینداری ئەنجومەنی ئاسایشی نەتەوەیی ئێران پەیامێکی ئاراستەی ئەمریکا کرد و ڕایگەیاند؛ تەنیا لەو کاتەدا ڕێڕەوێک بۆ دووبارە کردنەوەی گەرووی هورمز دروست دەبێت کە واشنتن بە تەواوی پابەندی بەڵێن و تەعهداتی خۆی بێت.