باڵیۆزخانەی ئۆکرانیا لە عێراق، بە فەرمی سەرجەم ئەو زانیاری و ڕاپۆرتانەی ڕەت کردەوە کە لەلایەن میدیای ئێرانییەوە سەبارەت بە جێگیرکردنی فڕۆکەی بێفڕۆکەوان (درۆن) و هێزی سەربازیی وڵاتەکەی لە هەرێمی کوردستان بڵاو کراونەتەوە.
ئاوێنە: ئەم هەڵوێستەی باڵیۆزخانەی ئۆکرانیا لە ڕێگەی ڕاگەیەندراوێکی فەرمییەوە هات، دوای ئەوەی ئاژانسی هەواڵی "تەسنیم"ی نزیک لە سوپای پاسدارانی ئێران، لە ڕاپۆرتێکدا و لەسەر زاری سەرچاوەیەکی ئەمنییەوە بانگەشەی ئەوەی کردبوو کە گوایە "ئۆکرانیا هەزاران درۆن و یەکەی سەربازی لە هەرێمی کوردستان جێگیر کردووە".
لە بەرامبەر ئەو ڕاپۆرتەدا، باڵیۆزخانەی ئۆکرانیا لە ڕاگەیەندراوەکەیدا جەختی لەوە کردووەتەوە کە ئەو دەنگۆیانە بە تەواوی دوورن لە ڕاستییەوە و وەک "هەوڵێکی چەواشەکارانە" وەسفی کردوون. هەروەها ڕوونی کردووەتەوە کە وڵاتەکەی هیچ جۆرە درۆنێک، یەکەیەکی سەربازی، یان هەر کەسێکی پەیوەندیدار بە سوپای ئۆکرانیای نە لە هەرێمی کوردستان و نە لە هیچ ناوچەیەکی دیکەی عێراق جێگیر نەکردووە.
لە بەشێکی دیکەی ڕاگەیەندراوەکەدا، باڵیۆزخانەی ئۆکرانیا دووپاتی کردووەتەوە کە کیێڤ بە تەواوی ڕێز لە سەروەری و یەکپارچەیی خاکی عێراق دەگرێت، هاوکات پەیوەندییە دۆستانەکانی خۆی لەگەڵ هەردوو حکوومەتی فیدراڵیی عێراق و حکوومەتی هەرێمی کوردستان بە هەند وەردەگرێت و بەرز دەیاننرخێنێت.