کۆمسیۆنی باڵای سەربەخۆی هەڵبژاردنەکانی عێراق ڕایگەیاند، ئەنجومەنی کۆمسیاران بڕیاری لەسەر دیاریکردنی جێگرەوەی سێ پەرلەمانتاری عێراق داوە، کە بەهۆی وەرگرتنی پۆستی حکومەتی، کورسییەکانیان لە پەرلەمان بەتاڵ بووەتەوە.
ئاوێنە: ئاژانسی شەفق نیوز بڵاویکردووەتەوە، بەپێی بڕیارەکانی ئەنجومەنی کۆمسیاران حسێن ئەحمەد مالیکی، کاندیدی هاوپەیمانی دەوڵەتی یاسا لە پارێزگای کەربەلا، جێگرەوەی یاسر عەبد مالیکی دەبێت. حسێن مالیکی ١٦٬٢٩٤ دەنگی بەدەستهێناوە و لەڕووی ژمارەی دەنگەکانەوە کاندیدی دواتری لیستەکەی بووە، بە ڕیزبەندی دووەم.
هەروەها عەلی محەمەد فەیلی، کاندیدی هاوپەیمانی ئەساسی عێراقی لە پارێزگای بەغدا، جێگرەوەی موحسین عەلی مەندەلاوی دیاریکراوە. فەیلی ٤٬٢٣٤ دەنگی بەدەستهێناوە و ل ڕیزبەندی لیستەکەیدا پلەی چوارەمی هەبووە.
لە بڕیارێکی دیکەدا، وەسفی عاسی عوبەیدی، کاندیدی حیزبی تەقەدوم لە پارێزگای کەرکووک، جێگرەوەی محەمەد عەلی تەمیم دەبێت. عوبەیدی ١١٬١٠٢ دەنگی بەدەستهێناوە و لەڕیزبەندی لیستەکەیدا لە پلەی بیست‌وچوارەمدا بووە.
پەرلەمانی عێراق لە ١٥ی ئۆکتۆبەری ٢٠٢٦ دەنگی دا بۆ دیاریکردنی یاسر مالیکی وەک وەزیری ناوخۆ و موحسین مەندەلاوی وەک جێگری سەرۆکوەزیران، لەچوارچێوەی تەواوکردنی پێکهاتەی حکومەتی عەلی زەیدی، سەرۆکوەزیرانی عێراق.
