ژمارەیەک لە پارێزەرانی سلێمانی لە ڕاگەیەندراوێکی هاوبەشدا، کە ئاراستەی سەرۆکی دادگای تێهەڵچوونەوەی ناوچەی سلێمانی، سەرۆکی فەرمانگەی داواکاری گشتی و سەندیکای پارێزەرانی کوردستانیان کردووە، داوا دەکەن ڕێکاری ئاسایی بۆ دادگاییکردنی هەموو تۆمەتباران بگیرێتەبەر و جەخت لەوە دەکەنەوە نابێت تەواوی دامەزراوەی دادگا بەهۆی دۆسیەی کەسانی خاوەن پێگەوە پەکی بکەوێت.
ئاوێنە: لە ڕاگەیەندراوەکەدا هاتووە کە دادگا پێگەی بنەڕەتیی چەسپاندنی دادپەروەری، یەکلاکردنەوەی ناکۆکییەکان، گەڕاندنەوەی ماف بۆ ستەملێکراوان و جێبەجێکردنی سزای یاساییە بەسەر سەرپێچیکاراندا، بۆیە ناکرێت پێگەی ئەم دامەزراوەیە لە ئەرکە سەرەکییەکەی لابدات.
بەپێی وتەی پارێزەران، لە ئێستادا لە کاتی بەڕێوەچوونی دانیشتنەکانی دادگاییکردنی دۆسیەی دوو ئەندامی حیزبێک لە دادگای سلێمانی، دۆخێکی نائاسایی دروست دەکرێت لە ڕێگەی هێنانی هێزێکی زۆری چەکدار و گۆڕینی دادگا بۆ سەربازگە. هەروەها ئاماژە بەوە دەکەن کە لەو ڕۆژانەدا ڕێگری لە هاووڵاتییان و تەنانەت لە پارێزەرانیش دەکرێت بچنە ژوورەوە بۆ بەدواداچوونی دۆسیەکانیان، تەنانەت ئەو کەسانەشی کە ئەو ڕۆژە وادەی بینینی داوا یاساییەکانیان دیاریکراوە و سکاڵاکار یان سکاڵالێکراون.
ڕاگەیەندراوەکە ڕوونکردنەوەی داوە کە ئەم مامەڵەیە لە پاڵ نایاساییبوونی و دروستکردنی بێڕێزی بەرامبەر دادوەران، پارێزەران و بنەمای سەربەخۆیی دەسەڵاتی دادوەری، هاوکات دەبێتە هۆی ستەم و زەوتکردنی مافی هاووڵاتییانی دیکە، بە شێوەیەک:
دوواکەوتنی بڕیاردان لە کەیسی بژێوی منداڵانی بێ دەرامەت بۆ زیاتر لە مانگێک بەهۆی ڕێگریی هاتوچۆوە.
گەڕانەوەی ئەو شایەتحاڵانەی کە لە دەرەوە هاتوون و بەهۆی ڕێگرییەکانەوە ئامادە نابن، ئەمەش مەترسیی لەدەستچوونی مافی هاووڵاتییانی دیکە دروست دەکات.
درێژکردنەوەی ماوەی ڕاگرتنی ئەو تۆمەتبارانەی کە لە بنەڕەتدا بێتاوانن، بەهۆی ئەوەی لە کاتی خۆیدا کارەکانیان بۆ ناکرێت.
گەڕاندنەوەی نەخۆش و خەڵکی کەمدەرامەت کە بە مەبەستی ڕاییکردنی مامەڵەکانیان لە شار و شارۆچکەکانی دەرەوەی سلێمانی ڕوویان لە دادگا کردووە و بێ هیچ هۆکارێکی یاسایی ڕێگرییان لێ دەکرێت.
لە کۆتایی بڵاوکراوەکەدا، پارێزەرانی سلێمانی داوا لە لایەنە پەیوەندیدارەکان دەکەن هەڵوێستی جدی بنوێنن لە پێناو پاراستنی شکۆی دادگا و سەروەریی یاسا، دووپاتیشی دەکەنەوە کە سکاڵاکار و تۆمەتبار لە هەر پلە و پۆستێکدا بن، نابێت لە ڕۆژی دادبینییاندا تەواوی دادگا پەکبخرێت، بەڵکو پێویستە ڕێوشوێنی تر بگیرێتەبەر بۆ ڕێگریکردن لە دووبارەبوونەوەی ئەم دۆخە بە دوور لە بێڕێزیکردن بە هاووڵاتییان و پارێزەران، چونکە دادگا موڵکی گشتییە و موڵکی تایبەتی هیچ کەس و لایەنێک نییە.
