بەرپرسانی ئەمریکا بە تۆڕی هەواڵی "ئێن بی سی" (NBC)یان راگەیاندووە، کە نزیکەی دوو هەفتە لەمەوبەر و بە دیاریکراوی لە رێکەوتی ١٤ی ئەیلوولی ئەمساڵدا، بەهۆی ئاراستەکردنی موشەکێکی کروزی ئێرانیی دژە کەشتی بۆ سەر ئەو یەکە دەریاییەی تێیدا بوون لە گەرووی هورمز، ٨ سەربازی هێزی مارینزی ئەمریکی بریندار بوون.

ئاوێنە: ​بەرپرسەکان ئاماژەیان بەوە کردووە کە برینەکانیان مەترسیدار نەبوون، بەڵام بەهۆی هەڵمژینی دووکەڵ و دەرکەوتنی نیشانەکانی شۆکی مێشک (Concussion) چارەسەریان وەرگرتووە. هاوکات پشتڕاستیان کردووەتەوە کە ئەو سەربازانە سەر بە تیمی دابەزینی کەتیبەیەکی هێزە دەریاییەکانی ئەمریکا بوون و دوای هێرشەکە لە ماوەیەکی کورتدا گەڕاونەتەوە سەر ئەرکەکانیان.

​بەپێی زانیارییەکان، ئەو سەربازانە لەناو کەشتییەکی فەرمیی هێزی دەریایی ئەمریکادا نەبوون، بەڵکو لەناو یەکەیەکی دیکەی دەریاییدا بوون، کە بەرپرسە ئەمریکییەکان رەتیان کردووەتەوە جۆرەکەی ئاشکرا بکەن. لەلایەکی دیکەوە، بەرپرسێکی دیکەی ئەمریکی کە نەیویستووە ناوەکەی ئاشکرا بکرێت، بە تۆڕەکەی راگەیاندووە کە سوپای پاسدارانی ئێران هەوڵ دەدات بە شێوەیەکی نیمچە رۆژانە هێرش بکاتە سەر کەشتییەکان لەو ناوچەیەدا.

​لە پێشهاتێکی دیکەی پەیوەندیداردا، رۆژی یەکشەممەی رابردوو سوپای پاسدارانی ئێران رایگەیاند کە دەستیان بەسەر ژێردەریاییەکی بێفڕۆکەوانی پێشکەوتووی ئەمریکیدا گرتووە لە جۆری "ریموس-٦٠٠" (Remus-600)، کە بە وتەی ئەوان سەرقاڵی ئەنجامدانی ئۆپەراسیۆنی سیخوڕی بووە لە گەرووی هورمز.

​بەپێی راگەیەندراوەکەی سوپای پاسداران، ئەم ژێردەریاییە لە رێگەی بەکارهێنانی توانای هەواڵگری و تەکنەلۆژیای جەنگی ئەلیکترۆنییەوە کۆنترۆڵ کراوە، و لە ئێستادا لەلایەن شارەزایانی ئێرانییەوە پشکنینی بۆ دەکرێت بەمەبەستی دەرهێنانەوەی ئەو زانیارییانەی تێیدا پاشەکەوت کراون. ئەمە یەکەمین رووداوی لەم شێوەیە نییە؛ پێشتریش لە ٨ی ئەیلوولدا، لایەنی ئێرانی دەستبەسەرداگرتنی ژێردەریاییەکی دیکەی بێفڕۆکەوانی لە جۆری "دایڤ ئێڵ دی" (Dive LD) راگەیاندبوو.

​ئەم پێشهاتە مەیدانییانە لە کاتێکدان کە ململانێیەکی توندی راگەیاندن و فشاری ئەمنی و سیاسی لەسەر رێڕەوەکانی هاتوچۆی دەریایی لە گەرووی هورمز لە ئارادایە. تاران پێداگرە لەسەر قەدەغەکردنی جووڵەی کەشتییەکان لە دەرەوەی "رێڕەوی باکوور/شین" کە هاوسنوورە لەگەڵ کەناراوەکانی خۆی، بەو بیانووەی کە رێڕەوەکانی دیکە (نێودەوڵەتی، ناوەڕاست و باشوور کە هاوسنوورە لەگەڵ عومان) مینڕێژ کراون. لە بەرامبەریشدا، واشنتن لە زاری دۆناڵد ترەمپ، سەرۆکی ئەمریکاوە جەخت لەوە دەکاتەوە کە هێزەکانیان توانای تەواویان هەیە بۆ یاوەریکردنی کەشتییەکان و پاراستنی سەلامەتیی هەناردەکردنی نەوتی کەنداو.