دۆناڵد تره‌مپ، سه‌رۆكی ئه‌مریكا ره‌خنه له پێدانی خه‌ڵاتی نۆبڵی ئاشتی به ناڤی پیلای، كۆمیسیاری باڵای پێشوی مافه‌كانی مرۆڤ له نه‌ته‌وه یه‌كگرتوه‌كان و ژنه دادوه‌ری خه‌ڵكی ئه‌فریقای باشور، ده‌گرێت و ده‌ڵێت، من شایانی هه‌شت خه‌ڵاتی نۆبڵی ئاشتیم چونكه هه‌شت شه‌ڕم راگرتوه، به‌ڵام ئه‌و ژنه كه‌س ناوی نه‌بیستوه‌و نازانم چی كردوه جگه له‌وه‌ی زۆر رقی له ئیسرائیله.
ئاوێنه: دۆناڵد تره‌مپ، سه‌رۆكی ئه‌مریكا، ئه‌مڕۆ شه‌ممه، له په‌یامێكدا له تۆڕی كۆمه‌ڵایه‌تی تروس سۆشیاڵ له‌باره‌ی پێدانی خه‌ڵاتی نۆبڵ به ناڤی پیلای، له‌گه‌ڵ دانانی وێنه‌یه‌كی ناوبراودا وتویه‌تی، ئەمە ئەو ژنەیە کە خەڵاتی نۆبڵی ئاشتیی پێبەخشرا لەبری ویلایەتە یەکگرتوەکانی ئەمریکای مەزن و نوێنەرەکەی کە منم و کۆتاییم بە هەشت جەنگ هێناوه‌و زۆر شتی تریشم كردوه.
تره‌مپ وتوشیه‌تی"من هیچ سەبارەت بەم ژنە نازانم، و هیچ کەسێکی تریش هیچ نازانێت! لە ڕاستیدا، تا ئەو شوێنەی من ئاگادار بم، هیچ کەسێک ناوی ئەم ژنەی نەبیستوە جگە لەو راستییه‌ی کە زۆر بە ئاشکرا ڕقی لە ئیسرائیلە."
ئه‌وه‌شی خستۆته‌ڕو"من نازانم ئەم ژنە چی کردوە. من کۆتاییم بە 8 جەنگ هێناوە، بە ناردنی نامە لەلایەن هەر سەرۆک و سەرۆک وەزیرانێکەوە لەو وڵاتانەی کە هاوکاریم کردون بۆ لیژنه‌ی نۆبڵی نەرویجی."
تره‌مپ هێمای بۆ ئه‌وه‌ش كردوه كه نزیكه له‌وه‌ی كۆتایی به دو جه‌نگی دیكه‌ش بهێنێت كه جه‌نگی ئێران و جه‌نگی ڕوسیاو ئۆکرانیان.
وتوشیه‌تی، ئەو 8 جەنگه‌ی پێشتر کۆتاییم پێهێناون، هەر یەکێکیان، بە تایبەتی جه‌نگی پاکستان و هیندستان، زۆر زیاتر بو لەوەی پێویست بو بۆ بردنی خەڵاتی نۆبڵ. لە ڕاستیدا، دەبو من 8 خەڵاتی نۆبڵی ئاشتیم پێ ببه‌خشرێت، نەک تەنیا یه‌ك خه‌ڵات.
وه‌ك تره‌مپ خۆی ئاماژه‌ی پێداوه، ئه‌م 8 جه‌نگه‌ی راگرتون: کامبۆدیا و تایلاند، كۆسۆڤۆ و سڕبیا، كۆماری دیموکراتیی کۆنگۆ و ڕواندا، پاکستان و هیندستان، ئیسرائیل و ئێران، میسر و ئه‌سیوبیا، ئەرمەنستان و ئازەربایجان، ئیسرائیل و حەماس.
تره‌مپ ستایشی زیاتری خۆی كردوه‌و وتویه‌تی"سەرەڕای ئەوەش، ڕێگریم لە ئێران کرد چەکی ئەتۆمی به‌ده‌ستبهێنێت و تەواوی ڕۆژهەڵاتی ناوەڕاست و لە کۆتاییدا شوێنانی زۆر دورتر وێران بكات، من ژیانی کەسانێکی زیاترم ڕزگار کردوە لە هەر کەسێکی تر لە مێژودا."
ئه‌وه‌شی خستۆته‌ڕو، وەک چۆن ماریا کۆرینا ماچادۆ، کە کەسێکی بەڕاستی بەڕێزە، کاتێک خەڵاتی نۆبڵی ساڵی ڕابردوی خۆی پێبەخشیم، بە ڕاگەیاندنەکانی وت: "دۆناڵد ترەمپ کۆتایی بە زۆر جەنگ هێناوە و شایستەی خەڵاتی نۆبڵی ئاشتییە زیاتر لە هەر کەسێک کە تا ئێستا وەریگرتبێت."
سه‌رۆكی ئه‌مریكا وتوشیه‌تی "من هەمو بارمتەکانم لە ئیسرائیل گەڕاندەوە، بە 28 بارمتەی کۆتاییەوە، چ زیندو و چ مردو و بۆ ئەوەش لەگەڵ حەماس کارم کرد، هیچ کەسێک بڕوای نەدەکرد ئەمە سه‌ربگرێت! من دیکتاتۆری خراپەکاری جیهان، نیکۆلاس مادۆرۆم لە ڤه‌نزوێلا لادا و لە پڕۆسەی ئەوەدام ڤه‌نزوێلا بکەمە دیموکراسییەکی دەوڵەمەند. بە هەمان شێوەش لەگەڵ ئێراندا، ڕێگریم لێکردن لە وێرانکردنی ئیسرائیل، ڕۆژهەڵاتی ناوەڕاست، و ئەوروپا."
ئه‌و به‌رده‌وامی داوه به ستایشكردنی خۆی و ئه‌وه‌شی وتوه"بە بەبەردەوامی ڕێگری دەکەم لە جەنگی نێوان کۆریای باشور و کۆریای باکور، ژاپۆن و کۆریای باکور. چین و تایوانیش زیاد بكه‌م بۆی، لەگەڵ چەندین ناوچەی تری ئاڵۆز، کە نەبوبونە بەشێک لە جەنگەکان تەنها بەهۆی سەرۆک دۆناڵد جەی ترەمپ و ویلایەتە یەکگرتوەکانی ئەمریکاوە."
تره‌مپ وتوشیه‌تی "سەرەڕای هەمو ئەمانە، خەڵاتی نۆبڵ بەخشرا بە کەسێکی لیبراڵ کە لە نەتەوە یەکگرتوەکان کار دەکات و هیچ کەسێک تا ئێستا ناوی نەبیستوە. لە هەمو ئەو جەنگانەی کە من کۆتاییم پێهێناون، هەرگیزاوهەرگیز قسەم لەگەڵ نەتەوە یەکگرتوەکان نەکردوە، ئەوان هیچ هاوکارییەکیان نەکرد. ویلایەتە یەکگرتوەکانی ئەمریکا، کە لەلایەن منەوە، وەک سەرۆکتان، نوێنەرایەتی دەکرێت، دەبو خەڵاتی نۆبڵی ئاشتی وەربگرێت، بەڵام وەری نەگرت. ئەمە لەکەیەکه نه‌سڕاوه‌یه لەسەر نەرویج، لەکەیەک کە هەرگیز لەبیر ناکرێت. خەڵاتی نۆبڵی "ئاشتی" بۆ هەمیشە ناوبانگی زڕێنرا لەلایەن کۆمەڵێک ئایدۆلۆژیستی ڕادیکاڵەوە کە دژی دیموکراسین و دوژمنی شارستانیەتن!"