په‌رله‌مانی كوردستان رایده‌گه‌یه‌نێت، كونسوڵ و نوێنه‌رانی وڵاتان له هه‌رێم له كۆبونه‌وه‌ی ئه‌مڕۆیاندا له‌گه‌ڵ سه‌رۆكایه‌تی په‌رله‌مان ده‌ستخۆشیان له هه‌نگاوی كاراكردنه‌وه‌ی په‌رله‌مان كردوه.
ئاوێنه: په‌رله‌مانی كوردستان له راگه‌یه‌ندراوێكدا وتی، ئەمڕۆ پێنجشەممە ٥/١١/٢٠٢٦ لە دەستپێشخەرییەکی دیپلۆماسیدا د. ڤاڵا فەرید سەرۆکی پەرلەمانی کوردستان، پێشوازی لە کۆنسوڵ و نوێنەرانی وڵاتان کرد.
ئه‌وه‌شی خستۆته‌ڕو، لە دیدارێکدا کە هەر یەک لە ڕامی نووری جێگری سەرۆکی پەرلەمان و مونا نەبی نادر قەهوەچی سکرتێری پەرلەمانی کوردستان ئامادەی بوون، تیشکخرایە سەر کاراکردنەوەی پەرلەمانی کوردستان و جەخت لە پاراستنی قەوارەی دەستووری و شەرعی هەرێمی کوردستان کرایەوە.
وه‌ك له راگه‌یه‌ندراوه‌كه‌دا هاتوه، د. ڤاڵا فەرید سەرۆکی پەرلەمانی کوردستان له كۆبونه‌وه‌كه‌دا باسی لە گرنگی کاراکردنەوەی پەرلەمانی کوردستان بە گوێرەی ماددەکانی (٤٦، ٤٧، ٤٨) لە یاسای ژمارە (١) ی ساڵی ( ١٩٩٢) و پەیرەوی ناوخۆی پەرلەمان کرد و بە هەنگاوێکی پێویستی بۆ پاراستنی قەوارەی هەرێمی کوردستان دانا، هاوکات ڕایگەیاند؛ دووساڵ دواکەوتن لەسەر کاراکردنەوەی پەرلەمان کاریگەری نەرێنی نەک تەنیا لەسەر پڕۆسەی یاسایی هەرێمی کوردستان هەبووە، بەڵکو مەترسی لەسەر مانەوە وپاراستنی قەوارەی هەرێمی کوردستان دروستکردبوو، هەروەها جەختی لەوە کردەوە کە پێویستە سەرجەم فڕاکسیۆنەکانی نێو پەرلەمان بگەڕێنەوە بۆ بەجێ گەیاندنی ئەرکی پەرلەمانیی خۆیان کە بریتیە لە یاسادانان و چاودێری، سەرۆکی پەرلەمانی کوردستان ئەوەشی خستەڕوو کە کاراکردنەوەی پەرلەمان دژی هیچ هێز و لایەنێکی سیاسی نیە و لە بەرژەوەندی هەموو لایەن و پێکهاتەکانە.
به‌گوێره‌ی راگه‌یه‌ندراوه‌كه، دواتر جێگری سەرۆکی پەرلەمان و سکرتێری پەرلەمانی کوردستان جەختیان لە وتەکانی سەرۆکی پەرلەمانی کوردستان کردەوە و کاراکردنەوەی پەرلەمانیان بە گرنگ خستەڕوو بۆ پاراستنی قەوارەی هەرێمی کوردستان و دەستەبەرکردنی مافی سەرجەم پێکهاتە و ئاین و ئاینزاکانی هەرێمی کوردستان.
له راگه‌یه‌ندراوه‌كه‌دا ئه‌وه‌ش هاتوه، لەلایەن خۆیانەوە کۆنسوڵ و نوێنەرانی وڵاتان لە هەرێمی کوردستان دەستخۆشیان لە هەنگاوی کاراکردنەوەی پەرلەمانی کوردستان کرد بۆ پێشخستنی پرۆسەی دیموکراتی لە هەرێمی کوردستاندا و هیوایان خواست لە داهاتووشدا پەیوەندییەکانیان لەگەڵ پەرلەمانی کوردستاندا پته‌وتر بكه‌ن.