ژنە هونەرمەندێکی خەڵکی شاری مەریوان لە ڕۆژهەڵاتی کوردستان، دوای تێپەڕاندنی ٣٦ ڕۆژ لە دەستبەسەرکردن لەلایەن هێزە ئەمنییەکانی ئێرانەوە، بە دانانی بارمتەیەکی دارایی قورس لە بەندیخانەی ناوەندیی سنە بە شێوەیەکی کاتی ئازاد کرا.
ئاوێنە: بەپێی ئەو زانیارییانەی ماڵپەڕی (کۆڵبەر نیوز) بڵاوی کردووەتەوە، ئەمڕۆ ژینا ئەحمەدی، هونەرمەندی خەڵکی گوندی "نێگل" و دانیشتووی شاری مەریوانی سەر بە پارێزگای سنە، دوای تەواوکردنی ڕێکارە یاساییەکانی تایبەت بە دانانی بارمتە، توانیویەتی بە شێوەیەکی کاتی لە زیندان بێتە دەرەوە.
لە ڕاپۆرتەکەدا ئاماژە بەوە دراوە، ئازادکردنی ئەو هونەرمەندە کوردە دوای ٣٦ ڕۆژ مانەوە بووە لە بەندیخانەی ناوەندیی شاری سنە، کە لە بەرانبەر دانانی بارمتەی یەک ملیارد و ٨٠٠ ملیۆن تمەنی بڕیاری ئازادکردنی کاتیی بۆ دەرچووە، تا کاتی بەڕێوەچوونی پرۆسەی دادگاییکردنەکەی.
ژینا ئەحمەدی، کە لە ناوەندە هونەرییەکاندا بە ناوی هونەریی "ژیڵەمۆ" دەناسرێت، یەکێکە لە چالاکوانە فەرهەنگییەکانی ناوچەکە و دامەزرێنەری ناوەندی فەرهەنگی و هونەریی ماڵی مۆسیقای "ژیڵەمۆ"یە لە شاری مەریوان. ئەم ناوەندە بە شێوەیەکی سەرەکی لە بوارەکانی فێرکاریی مۆسیقا، گۆرانیبێژی، شێوەکاری و سینەمای تایبەت بە منداڵان چالاکی ئەنجام دەدات.
سەبارەت بە چۆنیەتیی دەستگیرکردنەکەشی، سەرچاوەکە ڕوونی کردووەتەوە کە ناوبراو لە ڕۆژی ٥ـی تشرینی یەکەمی مانگی ڕابردوو، لە میانی هەڵکوتانە سەر ماڵەکەی لە شاری مەریوان لەلایەن هێزە ئەمنی و سەربازییەکانی ئێرانەوە دەستبەسەر کراوە و دواتر ڕاستەوخۆ بۆ بەندیخانەی ناوەندیی سنە گواستراوەتەوە.
بەگوێرەی زانیارییە بڵاوکراوەکان، ژینا ئەحمەدی لە ماوەی ئەو ٣٦ ڕۆژەی دەستبەسەرکردنیدا، لە مافە سەرەتاییەکانی وەک دەستڕاگەیشتن بە پارێزەر، ئەنجامدانی پەیوەندیی تەلەفۆنی و چاوپێکەوتنی ڕاستەوخۆ لەگەڵ خێزانەکەی بێبەش کراوە. هاوکات، تا کاتی بڵاوبوونەوەی هەواڵی ئازادکردنەکەی، لایەنە پەیوەندیدارەکان و دەزگای دادوەریی ئێران هیچ ڕوونکردنەوەیەکی فەرمییان لەبارەی هۆکاری دەستبەسەرکردنەکەی و جۆری ئەو تۆمەتانەی ڕووبەڕووی کراونەتەوە، ئاشکرا نەکردووە.