ناوەندی کۆنترۆڵکردن و رێگریکردنی پەتای ڤایرۆسی کۆڕۆنا رایگەیاند، لە ٢٤ کاتژمێری رابردوو١١ هەزار و ١٢ حاڵەتی دیکەی توشبوون بە ڤایرۆسی کۆڕۆنا تۆمارکرا، کۆی گشتی ژمارەی توشبووان لەو وڵاتە ٢٠٩ هەزار کەسی تێپەڕاند.
ئاوێنه: لە روونکردنەوەیەکدا ناوەندی کۆنترۆڵکردن و رێگریکردنی پەتای ڤایرۆسی کۆڕۆنا ئاماژەی بەوە دا کە تەنها لە ٢٤ کاتژمێری رابردوو ١١ هەزار و ١٢ حاڵەتی نوێی توشبوون بە ڤایرۆسی کۆڕۆنا تۆمارکراوە، هەفتەیەکە رۆژانە زیاتر لە ١٠ هەزار حاڵەتی نوێی توشبوون لەو وڵاتە تۆمار دەکرێت.
هاوکات لە روونکردنەوەکەدا راگەیەندراوە کە ژمارەی گیان لەدەستدان لە ٢٤ کاتژمێری رابردوو ٨٨ کەس بووە و بەو پێیەش کۆی گشتی ژمارەکە گەیشتووەتە هەزار و ٩١٥ کەس. هەروەها ژمارەی چاکبوونەوە بە زیادبوونی ٢ هەزار و ٣٩٠ کەس بۆ ٣٤ هەزار و ٣٠٦ کەس بەرزبووەوە.
بەوپێیەش رووسیا دوای ئەمریکا، ئیسپانیا، ئیتاڵیا، بەریتانیا لە پلەی پێنجەم دایە، مۆسکۆ-ی پایتەختی رووسیا لەرووی حاڵەتەوە زۆرترینی تۆمار کردووە کە ژمارەکە ١٠٩ هەزار و ٧٤٠ کەسە.