خامنەیی: لە بەرەنگاربوونەوەی تیرۆرستان هاوکاری تورکیا دەبین
  2022-07-19       457       

عەلی خامنەیی ڕێبەری باڵای کۆماری ئیسلامیی ئێران لە کۆبوونەوەیدا لەگەڵ ڕەجەب تەیب ئەردۆغان سەرۆکی تورکیا ڕایگەیاند، “لە بەرەنگاربوونەوەی تیرۆرستاندا هاوکاری تورکیا دەکەین”.

ئاوێنه‌: ئەمڕۆ سێشەممە 19ی تەمموزی 2022 ڕەجەب تەیب ئەردۆغان لە سەردانەکەیدا بۆ ئێران سەردانی خامنەیی کرد و کۆبوونەوەیەکیان ئەنجامدا.

لەوبارەیەوە نوسینگەی خامنەیی ڕاگەیەندراوێکی بڵاوکردەوە تێیدا ئاماژەی بەوەکرد، “ئەردۆغان داوای لە ئێران کردووە لە ڕوبەڕوبوونەوەی تیرۆرستاندا هاوکاریان بێت، لە بەرامبەریشدا خامنەیی بەڵێنی داوە لە بەرەنگاربوونەوەی تیرۆردا هاوکاری تورکیا بکات”.

لەبارەی دۆخی سەربازی سوریاش خامنەیی وتویەتی، “هێرشی سەربازی تورکیا بۆسەر باکوری سوریا زیانی تورکیا و سوریای تێدایە و دەبێت ڕێز لە یەکپارچەیی سوریا بگیرێت”.

جەختی لەوەش کردووەتەوە کە نابێت متمانە بە پشتیوانی و هاوکارییەکانی ئەمریکا و ئیسرائیل بکرێت لە ناوچەکەدا.

زۆرترین بینراو
© 2022 Awene Online, Inc. All Rights Reserved.
×