ئا: ئاوێنە

د. بورهان یاسین، نوسەرو سیاسەتمەدارو کەسایەتی دیاری کوردستان، لەم گفتوگۆیەیدا لەگەڵ ئاوێنە دەڵێت "دەکرێت هێنانە خوارەوەی مەکۆی "سەرەکی" گۆڕان بەتەواوەتی لەگردی زەرگەتە، لەڕووی رەمزییەوە بەواتای "جێهێشتنی نەوشیروان مستەفا" بێت‌".

ئاوێنە: کۆپیەکی ئەو نامەیەمان دەستکەوتووە کە ئێوە لە ٢٧ی ١٢ی ٢٠٢٤ بۆ هەردوو بەشەکەی گۆڕانتان ناردوەو بەپێی نامەکە کۆتایی بەنێوەندگیری لەنێوان هەردوو ئاڕاستەکەی گۆڕان دەهێنن، دەمانەوێ بزانین ئایا چۆن بوو گەیشتنە ئەو بڕیارە؟

بورهان یاسین: سەرەتا پێویستە بڵێم کە:

١/ هەوڵی ئێمە بۆ ئەوەی یارمەتیدەر بین بزووتنەوەی گۆڕان یەکبخرێتەوەو یەکبگرێتەوە هەر بەردەوامی ئەو پڕۆژەیە بوو کە نزیکەی پێنج ساڵ بەر ئێستاو دواتر کەمێک زیاتر لەدوو ساڵ بەر لەئێستاو ئەم جارەشیان هەوڵمان بۆدا بەناوی "پڕۆژەی ساڕێژکردنی زامەکان"، لەسەر باوەڕی ئەوەی کە جەستەی کورد پڕیەتی لەزام‌و لەبری راکردن لێیان‌و جێهێشتنیان لەدوای خۆمان، باشترو گونجاوتر ئەوەیە کە بەئیرادەو پێداگرییەوە هەوڵی ساڕێژکردنیان بدەین. بەندە ساڵانێکە گەیشتوومەتە ئەو باوەڕەی کە گۆڕانخوازە ناڕازییەکان لەبری ئەوەی بیر لەسەرپێخستنی پڕۆژەیەکی سیاسی نوێ بکەنەوە وا باشترە بەجیددی‌و دڵسۆزانە هەوڵی ساڕێژکردنی زامی ئەو زامدارە بکەن کە گۆڕانە، چونکە بەو کەرەستە کۆمەڵایەتییەی لەبەردەستە دەکرێ پڕۆژی سیاسی نوێش، بەئاسانی، ببێتەوە بەزامێکی نوێ، چونکە کەرەستە کۆمەڵایەتییەکە هەڵگری مۆکەڵێک رەگەزو هۆکاری کەوتنەوەی زامە.

٢/ هەر وەک لەکۆتایی نامەکەمدا جەخت کراوەتەوە، ئەگەرچی لەهەوڵەکانماندا بەتەواوەتی سەرکەوتو نەبووین، بەڵام توانیمان هەرنەبێ هەندێ هەنگاوی گرنگ بەئاڕاستەی دروستدا بهاوێژین. گرنگترینی ئەو هەنگاوانەش قەبوڵکردنی هەردوو ئاڕاستە بوو کە لەگەڵ یەکتردا دابنیشن، ئەمەش پشتڕاستکردنەوەی رادەیەک متمانە بەیەکترو قەبوڵکردنی رادەیەک لەشەرعیەتی بوونی یەکتر بوو. لەلایەکی ترەوە، پێویستە بەڕێزێکی زۆرەوە سوپاسگوزاری ئەو متمانە جوانە بین کە لەلایەن هەردوو ئاڕاستەکەی بزووتنەوەی گۆڕان لەمەکۆی کوردسات‌و مەکۆی گردی زەرگەتە پێمان بەخشرا. هەرگیز بەبێ متمانەیەکی ئەوها رۆڵی ئێمە وەک "ئاسانکارو نێوەندگیر" فەراهەم نەدەبوو.

٣/ دەرفەتە هەر لێرەشەوە سوپاسی هەردوو بەڕێزان کاک هەڤاڵ کوێستانی‌و کاک ئاکۆ وەهبی بکەم کە ئەوان لەڕووی کردارییەوە یارمەتیدەر بوون لەڕووی رێکخستن‌و راپەڕاندنی گفتوگۆو کۆبوونەوە مەیدانییەکان لەنێوان نوێنەرانی هەردوو ئاڕاستە. . . بەهەرحاڵ ئەم کاری هاوبەشە بێ ئاڵنگاری‌و گرفتیش نەبوو، بەتایبەتی لەبەرئەوەی خۆم نەمتوانی سەفەری کوردستان بکەم بۆ ئەوەی لەنزیکەوە لەگفتوگۆو دیدارەکاندا بەشداری بکەم.

٤/ پێویستە ئەوەش بڵێم کە لەهەردوو هەوڵەکەی پێشووترم‌و لەهەوڵی هەرە دواییشمدا بۆ رێکخستنەوەی ناو ماڵی گۆڕان، مافی "دادوەریم" بەخۆم نەداوە، ئەمەش بۆ هەردوو ئاڕاستەکەی بزووتنەوەی گۆڕان روونکراوەتەوە، تا بشکرێ خۆم لەقەزاوەت‌و دادوەری ئەپارێزم! بەڵام لەهەمان کاتیشدا خەڵک لەفەزای گشتیدا، بەتایبەتی گۆڕانخوازان لەهەردوو ئاڕاستەکەو تەنانەت گۆڕانخوازە ناڕازییەکانیش، مافی خۆیانە تا بکرێت زانیاریان دەربارەی پڕۆسەی "ئاشتەواییەکە" دەستبکەوێت!

دەربارەی پرسیاری بەڕێزتان، لەڕاستیدا، هەر وەک لەسەرەتای نامەکەدا روونکراوەتەوە، ئێمە هەر لەسەرەتاوە کە دەستمان بەهەوڵەکانمان کرد هەر زوو لەژێر فشاری کەمی کاتدا بووین. هەر لەبەر ئەوەش، هەر لەسەرەتاوە، لەپەیوەندی لەگەڵ هەردوو ئاڕاستەکە، بەڕاشکاوی پێداگریم لەسەر ئەوە کرد کە "بەڕێزان ئەو کاتەی لەبەردەستمانە بەساڵ‌و مانگ، تەنانەت بەهەفتەش، نییە بەڵکو بەڕۆژو سەعاتە"، چونکە لەراستیدا دەکرا، تەنانەت لەهەر خولەکێکیشدا، هەر یەکێ لەدوو ئاڕاستەکە هەنگاوێکی ئەوتۆ بهاوێژێ کە ئیتر ببێتە هۆی شکستهێنانی هەوڵەکان بۆ یەکخستنەوەی هەردوو ئاڕاستەکە. دەبێ، زۆر بەتایبەتی، ئەوە جەخت بکەمەوە کە هەوڵەکانی ئاڕاستەی کوردسات بۆ بەستنی کۆنفرانس (کە زۆر دواتر زانیم کە ئەو کۆنفرانسە بڕیار بووە لە ٢ی ئەم مانگەدا ببەسترێ، فشاری لەسەرمان زۆر زیاتر کرد، بەتایبەتی پەیوەندیدار بەکەمی کاتەوە. جگە لەمەش هەردوو ئاڕاستەکە بەگڕوتینەوە لەپەیوەندیدا بوون لەگەڵ کۆمیسیۆنی هەڵبژاردنەکانی عێراق، وەک دەربڕی ململانێیەکی توند لەسەر وەرگرتنی رەوایی (شەرعییەت) لەو کۆمیسیۆنە. دەبێ ئەوەش بڵێم کە، لەڕاستیدا، بەندە ئاگاداری بەشێکی کەمی وردەکارییەکانی ئەو هەوڵانە بووم. لێرەدا، گرنگە ئەوەش بڵێین کە ناکرێ تۆ هاوتەریب لەهەوڵی ئاشتەواییدا بیت، بەڵام لەهەمان کاتدا بەگڕوتینی زیاترەوە لەهەوڵی بەستنی کۆنفرانسی نیشتمانیدا بیت، جگە لەوەش هەردوو ئاڕاستەکە لەبەرامبەر یەکتردا هەموو جۆرە "کارتێک" بەکاربهێنن بۆ ئەوەی هەر یەکەیان تەواوی شەرعیەت لای خۆی بێت‌و بەمەش کۆتایی بەئاڕاستەکەی دیکە بهێنێت یا هەر نەبێ ئاڕاستەکەی تر ناچار بەسازش بکات، بەو شێوەیەی کە خۆی دەیەوێت! لەڕاستیدا زۆرێک لەو هەنگاوانەی کە دەهاوێژران، بەتایبەتی هەوڵدانی ئاڕاستەی کوردسات، بۆ بەستنی کۆنفرانسی نیشتمانی لەزووترین کاتدا، بەهەر حاڵ بەر لە ١٥ی ئاداری ٢٠٢٥، دژی بەندی پێنجەم (لەبەشی یەکەمی، واتە بەشی کورتخایەنی) ئەو پڕۆژەی ئاشتەواییە بوو کە بەندە لە ١٣ی ئۆکتۆبەری ٢٠٢٤ پێشکەشی بەهەردوو ئاڕاستەکەی گۆڕان کردو بووە بنەما بۆ گفتوگۆکان. لەو بەندەدا بەڕاشکاوی هاتووە: "هەردوولا هیچ هەنگاوێک ناهاوێژن‌و هیچ بەیاننامەیەک بڵاوناکەنەوە کە ببێتە بارگرژی‌و فراوانبوونی ئەو درزەی کە لەهەفتەو رۆژانی دواییدا لەڕیزەکانی بزووتنەوەکە کەوتۆتەوە". لەڕاستیدا هەر لەسەرەتای پڕۆسەی ئاشتەواییەکەدا هەردوولا پابەندبوونی خۆیان بەو بەشەی پڕۆژەکە (واتە قۆناغی کورتخایەن) راگەیاند، ئەگەرچی رادەیەک لە"ناڕونی" لەهەڵوێستی ئاڕاستەی کوردساتدا بەدیدەکرا.

تکایە بۆ تەواوی پڕۆژەکە بڕوانە پڕۆژەکە: "تراجیدیای بزووتنەوەی گۆڕان: هەموان پێویستییان بەئیستەیەکی جیددی‌و بەپەلە هەیە". https://burhanyassin.com/Tracidyay%20Gorran.pdf

ئاوێنە: هەر لەنامەکەتدا گلەیی لەگۆڕانی کوردسات دەکەی کە کشانەوەیان لەحکومەت نەبووە بەکردار و بەبڕیارێکی «تیۆریی‌و روکەش» لەقەڵەمی دەدەیت. پێتوایە زیانی ئەو بڕیارە روکەشانە زیاترە لەدەسکاری نەکردنی دۆخی گۆڕان لەحکومەت؟

بورهان یاسین: بەڵێ وایە، ئەم مەسەلەیە لەنامەکەدا بەڕوون‌و راشکاوی، بەڵام بەکورتی‌و بەچڕی، ئاماژەی پێدراوە. بەڵێ، دەستکارینەکردنی بوونی گۆڕان لەحکومەت زۆر باشتر بوو لەو شێوازە ناسەرکەوتووە لەدەستکاریکردن؛ تا بڵێی بڕیارەکە ناکارامە بوو، لەجێی خۆیدا نەبوو! ئەم هەنگاوە، وەک بڕیارێکی سیاسی تەنانەت کارەسات بوو، چونکە هەر لەساڵی ٢٠١٩ دوای شەش مانگ لەناو حکومەتدا مەسەلەی بەردەوام بوون یا نەبوون لەحکومەتدا، لەناو ریزەکانی گۆڕاندا، سەریهەڵدا. کەواتە بڕیارەکە لەدوای زیاتر لەپێنج ساڵ لەکێشمەکێشی "بوون یا نەبوون لەحکومەتدا" وەرگیرا. لەلایەکی ترەوە دەبوو لەنامەکەدا ئاماژە بەوەش بدەم کە هەڵسوکەوتی بەڕێزان لەگردی زەرگەتە لەمەسەلەی کشانەوە لەحکومەت زۆر باشتر نەبوو لەشێوازی مامەڵەی ئاڕاستەکەی کوردسات، لەمەسەلەی کشانەوە لەحکومەت، چونکە ئاشکرایە کە ئەو ئاڕاستەیە، لەسەر زاری بەڕێز دانا عەبدولکەریم، وەزیری ئاوەدانکردنەوە، ئەوە بوو کە ئەوان لەحکومەت ناکشێنەوە، بە بەهانەی ئەوەی کە بڕیارەکە لەلایەن جڤاتی نیشتمانییەوە نەدرابوو! بەڵام لەڕاستیدا ئاڕاستەی گردی زەرگەتە دەرفەتێکی زێڕینیان هەبوو کە بەشێوەیەکی زۆر جیاوازتر کاردانەوەکەیان ئاڕاستە بکەن، کاردانەوەیەک کە ئەیتوانی لەخزمەتی لەیەکتر نزیکبوونەوەو کەمکردنەوەی رادەی بارگژیدا بێت. دەکرا ئاڕاستەی گردەکە یا ئەوەتا بڵێ:

١/ ئەگەرچی بڕیاری کشانەوە لەحکومەت بە لەیەکگەشتن لەنێوان هەموو "هاوڕێکاندا" (واتە بەهاوبەشی لەنێوان هەردوو ئاڕاستەکەدا) نەدراوە، بەڵام ئێمە لەگەڵ ئەوەشدا، وەک نیەتپاکی‌و هەنگاوێک بۆ لەیەکتر نزیکبوونەوە، بەو بڕیارەوە پابەند دەبین؛ یان:

٢/ بڕیاری کشانەوە لەحکومەت "تاکلایەنە" دراوەو ئێمە چاوەڕوانین لەداهاتوودا ئەم بڕیارە لەنێوان "هەموو هاوڕێیاندا" (واتە لەلایەن گۆڕانێکی یەکبوو یەکگرتووەوە) بدرێ‌و بەرجەستە بکرێت!

ئاوێنە: لەکۆتایی نامەکەتدا رەخنە لەگۆڕانی گردەکەو کوڕەکانی نەوشیروان مستەفاش دەگری‌و باسی یەکلاکردنەوەی پرسی پەیوەندییەکانی نێوان کۆمپانیای وشەو بزوتنەوەی گۆڕان دەکەی، ئایا دەکرێ هەندێک زیاتر رۆشنایی بخەیتە سەر ئەو پرسە؟

بورهان یاسین: لەڕاستیدا بەدەقیقی بەم شێوەیە نییە، یا هەرنەبێ ئەمە شێوازی تێگەیشتنی خۆتانە لەنامەکە. ئەوەی کە لەم بارەیەوە گرنگە ئەوەیە کە:

١) لەنامەکەمدا، بەڕوونی‌و بەگرنگییەوە، جەخت لەسەر گەوهەریبوونی سێگۆشەی -گۆڕان، نەوشیروان مستەفا، گردی زەرگەتە- کراوەتەوە، سێگۆشەیەک کە پڕیەتی لەرەمزییەت (سیمبۆلیزم)، رەمزییەتێک کە یەکجار گرنگ بووەو گرنگە بۆ بزووتنەوەی گۆڕان. با روونتر بڵێم، ئەگەر هەر حزبێک لەحزبەکانی تری کوردستان بارەگای سەرەکی خۆی لەهەر جێگایەک بگوازێتەوە بۆ جێگایەکی دیکە ئەوەندە کاریگەری لەسەر حزبەکە نابێت، بەڵام لەحاڵەتی گۆڕاندا وانییە. ئەو رەمزییەتەی کە ئاماژەی پێدرا، کە لەسێگۆشەکەدا خۆی دەبێنێتەوە، یەکێکە لەکۆڵەگە سەرەکییەکانی شوناسی بزووتنەوەی گۆڕان، هەروەها دەکرێت هێنانە خوارەوەی مەکۆی "سەرەکی" گۆڕان بەتەواوەتی لەگردی زەرگەتە، لەڕووی رەمزییەوە بەواتای "جێهێشتنی نەوشیروان مستەفا" بێت‌و دەستبەرداربوون بێت لێی، یا هەرنەبێ لەزیهنی خەڵکدا ئەو تەفسیرو تێگەیشتنەی بۆ بکرێ، ئەمەش مەسەلەیەکی یەکجار گرنگ‌و هەستیارە.

٢/ ناکرێ هاتنەخوارەوەی بەشێک یا ئاڕاستەیەک لەبزووتنەوەی گۆڕان لەگردی زەرگەتە، تەنهاو تەنها بەڕووداوی داخستنی دەرگای سەرەکی گردی زەرگەتەوە پەیوەست بکرێ. ئەگەرچی رووداوی داخستنی ئەو دەرگا سەرەکییە بەڕووی بەڕێز عومەر سەید عەلی‌و هاوڕێکانیدا رۆڵێکی گرنگی بووبێ لەو هاتنە خوارەوەیە، بەڵام لەڕاستیدا ئەم "هاتنەخوارەوەیە"، لەبنەڕەتدا پەیوەندیدارە بەو کێشە چارەسەرنەکراوانەی کە هەر لەزووەوە، لەنێوان بزووتنەوەی گۆڕان لەلایەک‌و کۆمپانیای وشە لەلایەکی ترەوە، هەبوون. لەڕاستیدا زۆر زووتر، بەر لەداخستنی ئەو دەرگایە، بەتایبەتی ئاڕاستەیەک لەناو ناڕازییەکان هەبوو کە ئەیخواست بزووتنەوەی گۆڕان لەگردەکە جیابکرێتەوەو بهێنرێتە خوارەوە. واتە، هاتنە خوارەوەو گیرسانەوە لەباڵەخانەی کوردسات‌و کردنی ئەو باڵەخانەیە بەمەکۆ، ئاوێتە بوونی دوو فاکتەر بوو لەدۆخ‌و چرکەساتێکی یەکلاکەرەوەدا، فاکتەرێکیان نوێ، بەڵام ئەوەی تریان کۆن.

٣) دیدو بڕوای بڕاوبڕی بەندە (لەهەرسێ هەوڵەکاندا، پێنج ساڵ بەر لەئێستاو دوو ساڵ بەر لەئێستا بۆ هەستانەوەی گۆڕان‌و ئەمەی ئەم جارەشیان بۆ یەکخستنەوەی بزووتنەوەکە) بەردەوام ئەوە بووە کە بەبێ چارەسەری کێشەو تەنگەژەی نێوان بزووتنەوەی گۆڕان‌و کۆمپانیای وشە، هەرگیز مانەوەی ئەو بزووتنەوەیە لەگردی زەرگەتە ئاسان‌و بێ گرفت نابێت. لەڕاستیدا، دەتوانین بڵێین کە تەنانەت بەر لەکۆچی دوایی رەوانشاد نەوشیروان مستەفاش رادەیەک لەناڕونی‌و، تەنانەت رادەیەک لە"بارگرژی"، لەو پەیوەدنییەدا هەبوو. بەڵام بەکۆچی دوایی ئەو، بەتایبەتی شێوازی گواستنەوەی بەرپرسیاریی‌و خاوەندارییەتی کۆمپانیاو مولک‌و بەرژەوەندییە مادییەکان بۆ کوڕەکانی کۆچکردوو، کێشەکە زەقترو چڕتر بوویەوە. لەئاکامداو لەماوەی نزیکەی هەشت ساڵی رابردووشدا، بزووتنەوەی گۆڕان‌و ناوو پێگەی "مەعنەوی" رەوانشاد نەوشیروان مستەفا باجێکی قورسی ئەم حاڵەتەیان داوە. لەپڕۆژەی بەندەدا (لەبەشی یا قۆناغی "درێژخایەن"ی پڕۆژەکەدا) بەڕوونی هاتووە کە "ئەگەر واریسانی رەوانشاد نەوشیروان مستەفا پێیان وایە باشترین بژاردە ئەوەیە کە گۆڕان بەتەواوەتی لەگردی زەرگەتە بچێتە خوارەوە ئەوا پێویستە خواستێکی ئەوها بەڕوونی‌و راشکاوی هەم بەبزوتنەوەی گۆڕان‌و هەمیش بەفەزاو بەپانتایی گشتی بگات: دواجار چیتر پەیوەندی کۆمپانیای وشەو بزوتنەوەی گۆڕان دواخستن هەڵناگرێ‌و ئەو پەیوەندییە پێویستی بەچوارچێوەو فۆڕمێکی رون‌و توکمە هەیە، جا چ بەمانەوەی گۆڕان بێت لەگردی زەرگەتەو چ بەهاتنە خوارەوەی بزووتنەوەکە بەتەواوەتی لەو گردە!" هەروەها لەهەمان بەشی پڕۆژەکەدا، واتە لەبەشی (قۆناغی) درێژخایەندا، هاتووە کە "لەبارەی گردی زەرگەتەو هەندێ جێماوی ماددی دیکە، پێشتر زۆر پێشنیار کراون، وەک "وەقف"، "وەرەقەی قانوونی" یا "پەیمانی شەرەف". دواخستنی چارەسەرکردنی ئەم پرسە، دوای نزیکەی هەشت ساڵ لەدواخستن، چیتر دواخستن هەڵناگرێت!" (بڕوانە دەقی پڕۆژەکە لەلینکی ئاماژەپێدراو لەسەرەوە). واتە یەکێک لەپێشمەرجە هەرە گرنگەکانی بەدروست‌و تەندروست راگرتنی سێگۆشەی -گۆڕان، نەوشیروان مستەفاو گردی زەرگەتە- ئەوەیە کە پێویستە بەوردەکارییەکی زۆرو لەهەموو رەهەندەکانییەوە، پەیوەندییەکانی گۆڕان‌و کۆمپانیای وشە، پێناسە بکرێن‌و لەچوارچێوە (لەقاڵب) بدرێن، چوارچێوەیەک کە تیایدا بەڕوون‌و راشکاوی پابەندییەکان، مافەکان‌و ئەرکەکانی هەردوولا، واتە بزووتنەوەی گۆڕان‌و کۆمپانیای وشە، دەستنیشان بکرێن. دەیڵێمەوە: ئەم پرسە گەوهەری‌و گرنگە چیتر دواخستن هەڵناگرێ: دواخستنی بڕیاردان لەسەر چوارچێوەیەکی روون‌و سەقامگیر بۆ پەیوەندییەکانی گۆڕان‌و کۆمپانیای وشە بەزیانی گۆڕان‌و ناوو پێگەی مەعنەوی رەوانشاد نەوشیروان مستەفا تەواو دەبێت، هەروەک تا ئێستا روویداوە! دەکرێ ئەم هەموو زیانەش (وەک شێوازی خوێنبەربوون‌و نەزیفێکی بەردەوام) بەتایبەتی هەڕەشەیەکی جیددی بێت لەسەر پێگەی رەوانشاد نەوشیروان مستەفا لەکۆی پانتایی مێژوو لەئێستاو داهاتووشدا!

لەبەرامبەردا، چارەسەرکردنی کێشەی پەیوەندییەکانی گۆڕان‌و کۆمپانیای وشە:

١/ لەسودی گۆڕانە، چونکە ئەو هەموو خوێنبەربوونەی، بزووتنەوەکەو پانتایی هەرە فراوانی چاکسازیخوازی‌و عەدالەتخوازی‌و گۆڕانخوازی، رادەگرێت.

٢/ لەسودی کۆمپانیای وشەیە.

٣/ چارەسەرەکە بۆ واریسانی رەوانشاد نەوشیروان مستەفا زۆر بەباشی دەگەڕێتەوە: پێویستە ئەوان شتێک "ببەخشن" بۆ ئەوەی هەمووان ئاشتەواییەکی سەقامگیرو بەهرەدار بەدەستبهێنن.

٤/ بەتایبەتی، چارەسەرێکی ئەوها، بۆ پارێزراوی پێگەی مەعنەوی رەوانشاد نەوشیروان مستەفا باشە، چونکە زۆرێک لەگومان‌و نیشانە پرسیارە زیانبەخش‌و بێزارکارەکان دەڕەوێنێتەوە، گومانگەلێک کە هەر لەدوای کۆچی دوایی ئەو سەرکردەیە سەریانهەڵداو لەبەردەوامیشدا زیانێکی گەورەیان بەپێگە مەعنەوییەکەی ئەو سەرکردەیە گەیاند!

ئاوێنە: چۆن دەکرێ گۆڕان بگەڕێتەوە بۆ شاڕێگەی دروستی خۆی؟

بورهان یاسین: لەڕاستیدا، دەبێ ببوورن، وەڵامدانەوەی ئەم پرسیارە هەروا ئاسان نییە. پێویستە ئەم پرسیارە یەکێک بێت لەبابەتە هەرە سەرکی‌و گەوهەرییەکانی کۆنفرانسی داهاتووی بزووتنەوەی گۆڕان، بەمەرجێک ئەو کۆنفرانسە هی کۆکردنەوەی هەمووان بێت هەر لە"ئاڕاستەی مەکۆی کوردستات"و "ئاڕاستەی گردی زەرگەتە" تا دەگاتە لەشکرێک لەگۆڕانخوازانی ناڕازی، کە بەهۆیەک یا هۆکارێکی دیکە لەبزووتنەوەکە دوور کەوتوونەتەوەو خۆیان بەتەواوەتی لەدەرەوەی ئەو دوو ئاڕاستەیە دەبێننەوە. بەهەر حاڵ، دەکرێ، لەبابەتی گەڕانەوەی گۆڕان بۆ شاڕێگەی خۆی، بەکورتی ئاماژە بەدوو خاڵ بدەین:

١/ وەک لەوەڵامی پێشتردا وترا، گەڕانەوەی سێگۆشەی -گۆڕان، نەوشیروان مستەفاو گردی زەرگەتە- بۆ دۆخی دروست‌و تەندروستی خۆی، پێشمەرجێکی یەکجار گرنگە بۆ هەر هەستانەوەیەکی بزووتنەوەی گۆڕان. ئەمەش بەپابەندبوون بەئیرسی سیاسی رەوانشاد نەوشیروان مستەفاو دەستورو بنەما فیکرییە رەسەنەکانی پڕۆژەی گۆڕان‌و چارەسەرکردنی بڕاوبڕو توکمەو هەمەرەهەندی پەیوەندییە کێشەدارەکانی گۆڕان‌و کۆمپانیای وشە دەکرێ. بەبۆچوونی خۆم تەنانەت ئەگەر بەشەکەی کوردساتی گۆڕانیش بگەڕێتەوە گردی زەرگەتە ئەوا دیسان ئەو سێگۆشەیە ناتوانێ بێ گرفت‌و بەدڵنیاییبوونێکی تەواوەوە خۆی راگرێ‌و لەسەرپێی خۆی بوەستێ، چونکە بەردەوام هەڕەشەی هەڵوەشانەوەی لەسەر دەبێت، ئەگەر بێتوو کێشەکانی نێوان گۆڕان کۆمپانیای وشە بەشێوەیەکی بنبڕو شەفاف چارەسەر نەکرابن!

٢/ یەکێک لەگرنگترین شتەکان، بۆ ئەوەی گۆڕان هەستێتەوەو بکەوێتەوە سەر شاڕێگای رەسەنی خۆی، ئەوەیە کە ببێتەوە بەبزووتنەوە "جیاوازەکەی" جاران. کاتێکیش دەڵێین بزووتنەوەی جیاواز، واتای ئەوەی کە بەشێوەیەکی ریشەیی جیاواز لە، هەر نەبێ، هەردوو هێزە سیاسییە سەرەکیەکەی دەسەڵات، واتە یەکێتی‌و پارتی. راستییەکەی ئەوەیە کە دوای دوو جار لەبەشداریکردنێکی "بێکاریگەریی" یا هەرنەبێ "کەم کاریگەری‌و عەیبدار" لەحکومەتی هەرێمی کوردستاندا، گۆڕان "جیاوازییەکانی" خۆی، واتە خاڵی هەرە بەهێزی خۆی لەدەستداوە: ئەمڕۆ بەزۆر واتاوەو زۆر جار خەڵک بەئاسانی دەڵێ "ئاخر گۆڕانیش وەک پارتی‌و یەکێتی". ئەمە سەرنج‌و دەرەنجامێکی کەمەر شکێنە بۆ گۆڕان، کە خەڵک پێیگەیشتووە. پێویستیشە، لەهەمان کاتدا، بڵێین کە گەڕانەوەی گۆڕان بۆ پێگەی "بزووتنەوەیەکی جیاواز" کارێکی هەر ئەوها ئاسان نییە؛ ئەمە کارو خەبات‌و نەفەس درێژییەکی زۆری پێویستە!

تێبینی بۆ دەستکەوتنی وێنەیەکی "کامڵ"و گشتگیر دەربارەی هەوڵەکانمان جارێکی دیکە جەخت لەسەر گرنگی تەواوی پڕۆژەکە دەکەینەوە کە لەم پێگەیەدا بەردەستە:

http:// https://burhanyassin.com/Tracidyay%20Gorran.pdf 
 سوپاستان ئەکەم، سوپاس بۆ ئەم دەرفەتە.

نامەی د. بورهان یاسین کە ئاڕاستەی مەکۆی گۆڕانی کوردسات و مەکۆی گردی زەرگەتەی کردووەو تیایدا کۆتایی هاتن بەهەوڵەکانی بۆ یەکخستنەوەی هەردوو ئاڕاستەی بزووتنەوەکە رادەگەیەنێت: