پەرلەمانی عێراق ئامادەکاری دەکات بۆ دوبارە خستنەڕوی پڕۆژەیاسای خزمەتی سەربازی زۆرەملێ لەناو کۆمەڵێک یاسای گرنگدا كە دەڵێت، "ئامانجی یاساکە خزمەتکردنی کۆمەڵگە و گەنجانە لە ڕێگەی بەهێزکردنی دیسپلین، بونیادنانی لێهاتویی، چەسپاندنی بەهاکانی هاوڵاتیبون و پشتگیریکردنی دامەزراوە ئەمنییەکان بە هێزی گەنجی مەشقپێکراو".

ئاوێنە: سەفا جابری، ئەندامی کوتلەی سادقون ئەمڕۆ چوارشەممە بە "الصباح"ی ڕاگەیاند، لیژنەیەک پێکهێنراوە بۆ خوێندنەوەی یاساکانی پێشو و ئامادەکردنی خشتەیەکی نوێ بۆ یاسادانان، پێشبینیش دەکرێت یاساکە ببێتە یەکێک لە کارە لەپێشینەکان دوای هەموارکردنەوەی پەیڕەوی ناوخۆی پەرلەمان.

لایخۆیەوە نورا جەحیشی پەرلەمانتاری هاوپەیمانی سەروەری جەختیکردەوە کە تێپەڕاندنی یاساکە پەیوەستە بە ڕێککەوتنی سیاسی و ئیرادەی پەرلەمان، و پێویستە یاساکە دادپەروەری و یەکسانی بەدی بهێنێت و ڕەچاوی بارودۆخی ئابوری و کۆمەڵایەتی گەنجان بکات. 

لەلایەكی دیكەوە پەرلەمانتار محەمەد هادی شەمەری یاساکەی بە "جێی مشتومڕ و زیندو" وەسفکرد و وتی، ئامانج تەنها لایەنی سەربازی نییە، بەڵکو ئاوێتەکردنی گەنجانی پارێزگا و پێکهاتە جیاوازەکانە بۆ بەهێزکردنی یەکڕیزی نیشتمانی. 

هەروەها پەرلەمانتار عیماد یۆخەنا ئاماژەی بەوەکرد کە یاساکە بەپێی ماددەی (9/ دوەم)ی دەستور پابەندییەکی دەستورییە و تێپەڕاندنی دەبێتە هۆی کەمکردنەوەی خەرجییەکانی بودجە بۆ دامەزراندنی خۆبەخشەکان.

خزمەتکردنی سەربازی بەزۆرەملێ لە سەردەمی سەدام حسێن سەرۆکی پێشوتری عێراقدا جێبەجێدەکرا تاوەکو ساڵی 2003 و روخانی ئەو دەسەڵاتە. ساڵی 2003 بە سەرۆکایەتی پۆڵ بریمەر حاکمی مەدەنی ئەمریکی لە عێراق ئەو پڕۆژەیاسایە هەڵوەشێنرایەوە و جارێکی تر سوپا پێکهێنراوەیەوە و سەربازی زۆرەملێ کۆتایی پێهێنرا.