فواد حسێن، وه‌زیری ده‌ره‌وه‌ی عێراق رایگه‌یاند، ئەمریكا داوای رێكخستنەوەی بانكی ناوەندی و تێكەڵكردنی حەشدی شەعبی بە وەزارەتی بەرگری و چەكداماڵینی گروپە چه‌كداره‌كانی كردوه.
ئاوێنه: فواد حسێن، وه‌زیری ده‌ره‌وه‌ی عێراق له چاوپێكه‌وتنێكدا له‌گه‌ڵ كه‌ناڵی شه‌رقیه، رایگه‌یاند، ناوەڕۆكی ئەو پەیامانەی ئەمریكا گەیشتون بە ئێمە ئاماژە بە سەپاندنی سزا ناكەن، بەڵام كۆمەڵێك داواكاری و بۆچون و خاڵیان تێدایه، ئەو داواكارییانە لەڕێی باڵیۆزخانەكەمانەوە لە واشنتۆن پێمانگەیشتون.
فواد حسێن، وتیشی، سەركردەكانی چوارچێوەی هەماهەنگی و سەرۆك وەزیرانیش داوایان لە باڵیۆزی عێراق كرد بۆ ئەوەی لە واشنتۆن بە فەرمی پرسیاری هەڵوێستی ئەمریكا بكات، ئەویش پەیوەندی كردوە بە وەزارەتی دەرەوەو ئەنجومەنی ئاسایشی نیشتمانی ئەمریكا.
ئه‌وه‌شی خستۆته‌ڕو، ئه‌و لایه‌نه ئه‌مریكییانه‌ش داواى دوبارە رێكخستنەوەی بانكی ناوەندی و بانكەكانی عێراقيان كردوە لە بواری داراییدا، خاڵێكی تر پەیوەیستە بە حەشدی شەعبی و گروپە چەكدارەكان، داوایان كردوە حەشدی شەعبی تێكەڵ بە وەزارەتی بەرگری بكرێت و گروپەكانیش چەكەكانیان دابنێن.