شرۆڤەکارانى سیاسی و سەرکردەکانى هاوپەیمانى عەزم دەڵێن: چوارچێوەی هەماهەنگی پەشیمانە لە بەهێزکردن و پشتیوانیکردنی محەمەد حەلبووسی، چونکە حەلبووسی لە دوایین دانیشتنی پەرلەماندا پابەند نەبووە بەو ڕێککەوتنانەى لە نێوانیان هەبووە.
ئاوێنە: نەبیل عەزاوی شرۆڤەکارى سیاسی ڕایگەیاند، چوارچێوەی هەماهەنگی پەشیمانە لە بەهێزکردن و پشتیوانیکردنی محەمەد حەلبووسی، هەرکەسێک دژایەتی نوری مالیکی بکات مردووە پێش ئەوەی لە ڕووى سیاسییەوە کۆتایی بەخۆی بهێنێت، ئەمەش ئاماژەیە بۆ ئەوەی چانسی هاوپەیمانی عەزم لە قۆناغی داهاتوودا بە شێوەیەکی بەرچاو زیاد دەکات.
هەروەها حەیدەر ئەسەدی، سەرکردە لە هاوپەیمانی عەزم ڕایگەیاند، حەلبووسی لە دوایین دانیشتنی پەرلەماندا پابەند نەبووە بەو ڕێککەوتنانەى لەگەڵ چوارچێوەى هەماهەنگى هەبووە، ئەوەی نیگەرانمان دەکات پشتگوێخستنی شایستە سوونەییەکانە، بەهۆی هاوپەیمانییە ڕانەگەیەندراوەکانی حەلبووسییەوە.
ئەم لێدوانانە لە کاتێکدایە، ناکۆکییەکان لەناو پێکهاتەى سوونەدا پەرەدەسێنن سەبارەت بە شێوەی هاوپەیمانییەکانی داهاتوو، بەتایبەت دواى کاندیدکردنی نووری مالیکی بۆ پۆستی سەرۆکوەزیرانی عێراق و دژایەتى کردنى مالیکى لەلایەن محەمەد حەلبووسییەوە.