جارێکی دیکە ئەمریکا قبوڵکردنی نوری مالیکی وەک سەرۆک وەزیرانی داهاتووی عێراق ڕەت دەکاتەوە و بەرپرسێکی کۆشکی سپیش دەلێت: “حکومەتێک کە ئێران کۆنترۆڵی بکات، ناتوانێت بەرژەوەندییەکانی عێراق بخاتە پێش هەموو شتێکەوە”.
ئاوێنە: بەرپرسێکی باڵای کۆشکی سپی بە ڕۆژنامەی “شەرقولئەوسەت”ی ڕاگەیاند، ویلایەکە یەکگرتووەکان پشتیوانی عێراق دەکات لە هەوڵەکانی بۆ بەدیهێنانی تەواوی تواناکانی وەک هێزێکی سەقامگیر و گەشەسەندوو و ئارام لە ڕۆژهەڵاتی ناوەڕاستدا.
ئەو بەرپرسە باڵایە دووبارە جەختی لەسەر ڕەتکردنەوەی کاندیدکردنی نوری مالیکی بۆ پۆستی سەرۆک وەزیرانی عێراق لەلایەن ئیدارەی ئەمریکاوە کردەوە و وتی: “حکومەتێک کە ئێران کۆنترۆڵی بکات، ناتوانێت بەرژەوەندییەکانی عێراق بخاتە پێش هەموو شتێکەوە، یان عێراق لە ململانێ هەرێمییەکان بەدوور بگرێت و ناتوانێت برەو بە هاوبەشییەکی سوودبەخشی دوولایەنە لە نێوان ویلایەتە یەکگرتووەکان و عێراقدا بدات”.
ئەمەش لە کاتێکدایە کە نوری مالیکی لە نوێترین لێدوانێدا ڕەتیکردەوە لە کاندیدبوون بۆ پۆستی سەرۆک وەزیران بکشێتەوە.