محه‌مه‌د شیاع سودانی، سه‌رۆك وه‌زیرانی عێراق و بافڵ تاڵه‌بانی، سه‌رۆكی یه‌كێتی له كۆبونه‌وه‌ی نێوانیاندا جه‌خت له‌وه ده‌كه‌نه‌وه كه پێویسته هێزه نیشتمانییه‌كان به به‌رپرسیارێتی هاوبه‌شه‌وه كاربكه‌ن بۆ پێكهێنانی حكومه‌تێك كه توانای ته‌واوكردنی پڕۆسه‌ی ئاوه‌دانكردنه‌وه‌و گه‌شه‌پێدانی هه‌بێت.
ئاوێنه: به‌پێی راگه‌یه‌ندراوێكی نوسینگه‌كه‌ی، ئه‌مڕۆ پێنجشه‌ممه، محه‌مه‌د شیاع سودانی، سەرۆک وەزیرانی عێراق پێشوازی کردوه لە بافڵ تاڵه‌بانی، سەرۆکی یەکێتیی نیشتمانیی کوردستان.
لە كۆبونه‌وه‌ی نێوانیاندا تاوتوێی بارودۆخی گشتی وڵات كراوه‌و جەختیان کردۆتەوە لەسەر پێویستی بەردەوامیی هەماهەنگی و هاریکاری نێوان هەمو هێزە سیاسییەکان بۆ ڕوبەڕوبونەوەی ئاستەنگە جۆراوجۆرەکان و پاڵپشتیکردنی پلانەکانی گەشەپێدان و چاکسازی، بەشێوەیەک کە سەقامگیری لە سەرتاسەری وڵاتدا بەهێزتر بکات.
وه‌ك له راگه‌یه‌ندراوه‌كه‌دا هاتوه، هەر لەكۆبونه‌وه‌كه‌دا جه‌خت له‌وه كرایه‌وه كه هێزە نیشتیمانییەکان پاڵپشتی له تێڕوانینێکی یەکگرتو بكه‌ن و به به‌رپرسیارێتی هاوبه‌شه‌وه كاربكه‌ن بۆ تەواوکردنی شایستە دەستورییەکان و پێکهێنانی حکومەتێک کە توانای تەواوکردنی پرۆسەی ئاوەدانکردنەوەو گەشەپێدانی هەبێت تا ره‌نگدانه‌وه‌ی ئه‌رێنی لەسەر ژیانی هاوڵاتیان لە سەرتاسەری عێراق هه‌بێت.