وەزیرانی دەرەوەی عێراق و سعودیە جەختیان لە گرنگیی پاراستنی رێڕەوە ئاوییە گرنگەکان، بەتایبەتی گەرووی هورمز کردەوە و هەردوولا هەڵسەنگاندنیان بۆ پێشهاتە سەربازییەکان و ئەو هێرشانە کردووە، کە ڕووبەڕووی هەردوو وڵات بوونەتەوە.
ئاوێنە: وەزارەتى دەرەوەى عێراق ڕاگەیەندراوێکی بڵاوکردەوە و ئاماژەى بە پەیوەندییەکی تەلەفۆنی فوئاد حسێن وەزیری دەرەوەی عێراق لەگەڵ فەیسەڵ بن فەرحان، وەزیری دەرەوەی سعودیە کردووە.
بەپێی ڕاگەیەندراوەکە، دوا پێشهاتەکانی ناوچەکە و کاریگەرییەکانی لەسەر ئاسایش و سەقامگیری تاوتوێ کرد و هاوکات جەختیان لە گرنگیی پاراستنی ڕێڕەوە ئاوییە گرنگەکان، بەتایبەتی گەرووی هورمز کردەوە و هەردوولا هەڵسەنگاندنیان بۆ پێشهاتە سەربازییەکان و ئەو هێرشانە کردووە کە ڕووبەڕووی هەردوو وڵات بوونەتەوە.
هاوکات وەزیرانی دەرەوەی عیراق و سعودیە جەختیان لە مەترسیی بەشداریی لایەنی نوێ لە ڕووبەڕووبوونەوەکان کردەوە کە رەنگە ببێتەهۆی فراوانبوونی بازنەی جەنگەکە.
بەپێی ڕاگەیەندراوەکە، پێویستیی کارکردنی بەپەلە بۆ کۆنترۆڵکردنی قەیرانەکە و ڕێگریکردن لە فراوانبوونی کردە سەربازییەکان کردووە، باسیان لە گرنگیی پاراستنی ڕێڕەوە ئاوییە گرنگەکان، بەتایبەتی گەرووی هورمز کردەوە، بەهۆی ئەو بایەخە ستراتیژییەی بۆ ئابووریی جیهان و ئاسایشی وزە هەیەتی.
لای خۆیەوە فوئاد حسێن ئاماژەی بەوە کردووە، بەردەوامیی شەڕ دەبێتە هۆی تێکچوونی بازاڕی وزە و کاریگەریی نەرێنی لەسەر سەقامگیریی بازاڕی جیهانی دەبێت.
لە دوای هێرشەکانی ئەمریکا و ئیسرائیل بۆ سەر ئێران، جموجۆڵی کەشتییە نەوتهەڵگرەکان لە گەرووی هورمز وەستاوە، بە پێی هەواڵێکی ڕۆیتەرزیش لە دوو ڕۆژی ڕابردوودا تا ئێستا ١٥٠ کەشتی بارهەڵگر لە گەرووی هورمز ڕاگیراون.