ڕاوێژکاری دارایی سەرۆکوەزیرانی عێراق ڕادەگەیەنێت، وڵاتەکەیان بەردەوامە لە هەوڵەکان بۆ دابینکردنی ڕێڕەوی هەناردەکردنی نەوت و بەمەش بۆریی تورکیا و پڕۆژەی ئوردنی وەک ڕێگەی جێگرەوە ناوبردووە، لەگەڵ چەند پلانێکی دیکە.
ئاوێنە: مەزهەر محەمەد ساڵح، ڕاوێژکاری دارایی سەرۆکوەزیران بە ئاژانسی فەرمیی عێراقی وت "نەوت 90%ـی داهاتی دەوڵەتە و هەناردەکردنی پێویستییەکی نیشتمانییە. عێراق دەیەوێت لەم ڕێگەیەوە کورتهێنانی بودجە و خەرجییەکان بە تەواوی پڕ بکاتەوە".
دەربارەی رێگە جێگرەوەکەش، ناوبراو وتی "بۆریی تورکیا و پڕۆژەی ئوردنی وەک ڕێگەی جێگرەوە دەبێت، هەروەها هێڵە کۆنەکانی سعودیە چالاککراونەتەوە تا نەوت بە ئارامی بگاتە دەریای سوور".
ئەو ڕاوێژکارەی سودانی باسی پلانێکی دیکەش دەکات و دەڵێت "پەرەپێدانی پاڵاوگەکان و گواستنەوە بە تانکەر بژاردەی دیکەن؛ بەڵام گواستنەوەی 3 ملیۆن بەرمیل بە بارهەڵگر گرانە و پێویستی بە پلانێکی گەورەی مەیدانی هەیە".
"هەناردەکردن تەنیا بە نرخەوە بەستراو نییە، بەڵکو پەیوەندیی بە ئارامیی ڕێڕەوەکان و داخوازیی بازاڕە ئاسیاییەکانەوە هەیە کە کاریگەرییان لەسەر کۆی داهاتەکان هەیە". مەزهەر محەمەد ساڵح وای وت