لە چوارچێوەى شەڕ لە دژی ئێران، ئەمریکا و ئیسرائیل هێرش دەکەنە سەر بنکە و بارەگاکانى حەشدی شەعبی، تەنیا دوێنێ لە پارێزگاکانى ئەنبار، بابل و کەرکووک چەند جارێک بۆردوومان کراون، کە لە ئەنجامدا چەند چەکدارێکى حەشد کوژراون و برینداربوون.
ئاوێنە: ماوەى ١٣ ڕۆژە شەڕی نێوان ئێران و ئەمریکا-ئیسرائیل بەردەوامە و گرووپە لایەنگرەکانى ئێران لە عێراق هەر لە سەرەتای شەڕەکەوە پشتیوانیان بۆ ئێران دەبڕی، چاودێرانیش هۆشداریی تێوەگلانی عێراقیان بۆ ناو جەنگەکە دا و داوایان لە حکومەت کرد، نەهێڵێت عێراق ببێتە بەشێک لەم شەڕە، بەڵام حکومەت دەسەڵاتى بەسەر گرووپە چەکدارەکاندا نییە.
دوێنی لە شارۆچکەى قائیمى سەر بە پارێزگاى ئەنبار بارەگای لیواى ١٩ـى حەشدی شەعبی کرایە ئامانج، لە ئەنجامدا ٣٠ چەکدارى ئەو گرووپە کوژران و برینداربوون، بەڵام ئەمریکا و ئیسرائیل تا ئێستا بەفەرمى ئەو هێرشەیان نەگرتووەتە ئەستۆى خۆیان.
ئەو بارەگایەی حەشدى شەعبی لە نزیک فڕۆکەخانەی نێودەوڵەتی قائیمە، کە دەکەوێتە نزیکەی ٤٠٠ کم لە باکووری ڕۆژئاوای بەغدادەوە بە تەواوی خاپوور بووە.
هەروەها دوێنێ جارێکى دیکە بارەگەیەکى حەشدى شەعبی لە پارێزگاى بابل بە ئامانج گیرا، بەپێی گرتە ڤیدیۆییەکان بێت، تەقینەوەیەکى گەورە ڕوویداوە و دووکەڵێکى گەورە لە بارەگاکە بەرز بووەتەوە، بەڵام تا ئێستا بە وردى ژمارەى کوژراو و بریندارەکان دیار نییە.
هەر لەو چوارچێوەى ئەو هێرشانەدا بارەگەیەکى حەشدى شەعبی لە پارێزگاى نەینەوا بۆردوومان کرا، لە ئەنجامدا دوو چەکدارى ئەو گرووپە کوژران و سێ چەکداری دیکە بریندار بوون.
هاوکات درەنگانى ئەمشەو لە گەڕەکى بەدرى کەرکووک هێرشکرایە سەر بارەگایەکى حەشدی شەعبی (تورکمان) و لە ئەنجام دا چوار چەکدار کوژران و ١٣ چەکداری دیکە بریندار بوون، هەر زوو بریندارەکانى گەیەنرانە نەخۆشخانەى کەرکووک و چەکداران داواى خوێنیان لە هاوڵاتیان دەکرد، بۆ چەکدارە بریندارەکانیان.