قاسم ئەعرەجی، ڕاوێژکاری ئاسایشی نەتەوەیی عێراق، لە کۆبوونەوەیەکدا لەگەڵ باڵیۆزانی وڵاتانی یەکێتی ئەوروپا لە بەغداد ڕایگەیاند، کە عێراق پارێزگاری لە مسارە بێلایەنەکەی خۆی دەکات و ڕێگە نادات وڵاتەکەی بپێچرێتەوە ناو ململانێ و جەنگەکانی ناوچەکە.
ئاوێنە: ئەعرەجی جەختی کردەوە کە حکومەتی عێراق ڕێکاری توندی گرتووەتە بەر بۆ پاراستنی باڵیۆزخانە و نێردە بیانییەکان. فەرماندەی گشتیی هێزە چەکدارەکان فەرمانی داوە هەر لایەن و کەسێک هێرش بکاتە سەر نێردە دیپلۆماسییەکان، ڕووبەڕووی یاسا بکرێتەوە.
ڕاوێژکاری ئاسایشی نەتەوەیی ئاماژەی بەوە کرد کە عێراق دەیەوێت تیشک بخاتە سەر سەقامگیری و ئاوەدانکردنەوە، نەک ببێتە بەشێک لە جەنگ.
باڵیۆزانی یەکێتی ئەوروپا پاڵپشتی خۆیان بۆ سەقامگیری عێراق دەربڕی و سوپاسی حکومەتیان کرد بۆ پاراستنی نێردەکانیان. هەروەها سەرکۆنەی هێرشەکانی سەر هەرێمی کوردستان و شوێنە گرنگەکانی تری عێراقیان کرد.
لە کۆبوونەوەکەدا باس لەوە کرا کە هێزە سیاسییەکانی عێراق بەردەوامن لە تەواوکردنی ئیستحقاقە دەستوورییەکان بۆ بەهێزکردنی بنەماکانی دیموکراسی لە وڵاتدا.