بانکی ناوەندیی عێراق بە فەرمی ستراتیژییەکی نوێی بۆ چارەسەرکردنی گرفتی ئەو بانکانە ڕاگەیاند کە بەهۆی سزا نێودەوڵەتییەکانەوە لە مامەڵەی دۆلار بێبەشکراون. ئەم هەنگاوە وەک هەوڵێکی بەپەلە دەبینرێت بۆ کۆنتڕۆڵکردنی ناسەقامگیرییەکانی بازاڕی دراو و کەمکردنەوەی جیاوازیی نرخی دینار و دۆلار.
ئاوێنە: بۆ دەستەبەرکردنی شەفافییەت و جێبەجێکردنی پێوەرە نێودەوڵەتییەکان، بانکی ناوەندی پەنای بۆ کۆمپانیای وردبینی جیهانیی “Oliver Wyman” بردووە. ئامانج لەم هاوکارییە، ڕێکخستنەوەی ڕێکارە داراییەکانی ئەو بانکانەیە کە کەوتوونەتە ژێر سزاکانی ئەمریکاوە، تاوەکو بتوانن دووبارە بگەڕێنەوە ناو سیستەمی ئاڵۆگۆڕی جیهانی.
ئەم جوڵەیەی بانکی ناوەندی لە کاتێکدایە کە بازاڕی ناوخۆیی بەدەست چەند فشارێکی وەک پەیڕەوکردنی سیستەمی ئەلیکترۆنی (ئەسیکۆدا) لە دەروازە سنوورییەکان و کاریگەرییە توندەکانی ئاڵۆزییەکانی ناوچەکە دەناڵێنێت؛ ئەم هۆکارانە بوونەتە هۆی زیادبوونی خواست لەسەر دۆلار لە بازاڕی ڕەشدا.
پلانی چاکسازییەکە ژمارەیەک بانکی گرنگ دەگرێتەوە کە لە ئێستادا گەمارۆیان لەسەرە، لەوانە بانکەکانی: (ئەنساری ئیسلامی، ئەلقابز، ئاسیا، بابلی، شەرقلئەوسەت، ئیسلامی عەرەبی، ئەلئیتیحاد و جنوبی ئیسلامی). چاوەڕوان دەکرێت بە سەرکەوتنی ئەم پرۆسەی وردبینییە، فشارە داراییەکانی سەر عێراق کەم ببنەوە و ئاسۆیەکی ڕوون بۆ سەقامگیری نرخەکان بەدیار بکەوێت.