شەوی ڕابردوو چوارچێوەی هەماهەنگی ۱٦٦ـەمین کۆبوونەوەی بەپەلەی خۆی لە کۆشکی حکومەت ئەنجامدا، کە تێیدا چەند پرسێکی هەستیاری ناوخۆیی و ناوچەیی تاوتوێ کران، بەڵام سەرەڕای وەسفکردنی کۆبوونەوەکە بە "یەکلاکەرەوە"، بەشداربووان نەیانتوانی لەسەر کاندیدێک بۆ پۆستی سەرۆکوەزیرانی داهاتووی عێراق بگەنە ڕێککەوتن.
ئاوێنە: بەپێی ڕاگەیەندراوی نووسینگەی ڕاگەیاندنی چوارچێوەی هەماهەنگی، کۆبوونەوەکە بە ئامادەبوونی سەرۆکی ئەنجوومەنی باڵای دادوەری و بەرپرسی دەستەی حەشدی شەعبی بەڕێوەچوو. تەوەری سەرەکی کۆبوونەوەکە تەرخانکرابوو بۆ ئیدانەکردنی هێرشە بەردەوامەکانی سەر هێزە چەکدارەکان و حەشدی شەعبی، کە وەک "پێشێلکارییەکی ئاشکرای سەروەریی عێراق" ناوزەند کران.
لە بەشێکی تری کۆبوونەوەکەدا، چوارچێوەی هەماهەنگی پشتیوانی تەواوی خۆی بۆ بڕیارەکەی ئەنجوومەنی وەزیران بۆ ئاسایشی نیشتمانی دەربڕی، کە تێیدا هێزە ئەمنییەکان و حەشدی شەعبی سەرپشک کراون لە وەڵامدانەوە و بەرگریکردن لە خۆیان بەرامبەر هەر هێرشێک. هاوکات، ئیدانەی بە ئامانجگرتنی دامەزراوە دەوڵەتییەکان و نوێنەرایەتییە دیپلۆماسییەکانیان کرد و جەختیان لە گرتنەبەری ڕێکاری یاسایی توند دژی ئەنجامدەرانی ئەو هێرشانە کردەوە.
لەسەر ئاستی مرۆیی و ناوچەیی، چوارچێوەی هەماهەنگی هاوسۆزی خۆی بۆ گەلانی ئێران و لوبنان دووپاتکردەوە و داوای کرد ئەو هاوسۆزییە لە چوارچێوەی چالاکی جەماوەری و دەستپێشخەریی یارمەتییە مرۆییەکاندا ڕەنگ بداتەوە.
سەرەڕای ئەم هەڵوێستە سیاسی و ئەمنییانە، گرێکوێرەی دەستنیشانکردنی کاندیدی سەرۆکوەزیران وەک خۆی مایەوە و کۆبوونەوەکە نەبووە مایەی کۆتاییهێنان بەو بنبەستە سیاسییەی کە چاوەڕوان دەکرا تێپەڕێنرێت.