لە پەرەسەندنێکی نوێی ئەمنیدا، گرووپە چەکدارەکانی نزیک لە ئێران لە عێراق و لوبنان قۆناغێکی نوێی هێرشەکانیان بۆ سەر بەرژەوەندییەکانی ئەمریکا و ئیسرائیل ڕاگەیاند، ئەمەش وەک وەڵامێک بۆ ئامادەیی سەربازیی ئەمریکا و هێرشەکانی ئیسرائیل بۆ سەر لوبنان.
ئاوێنە: ئەبومەهدی جەعفەری، وتەبێژی گرووپی چەکداری "سەرایا ئەولیا دەم"، لە ڕاگەیاندراوێکی فەرمیدا هۆشداریی توندی دایە وڵاتانی ناوچەکە و ڕایگەیاند، کە هێزەکانی "مقاوەمەی ئیسلامی" تەواوی بوونی سەربازیی ئەمریکا لە وڵاتانی کەنداو و ئوردن دەکەنە ئامانج.
جەعفەری ئاماژەی بەوە کرد کە پلانی ئەمریکا بۆ جێگیرکردنی ٥٠٠٠ سەربازی نوێ لە ناوچەکە، پاڵنەر دەبێت بۆ ئەوەی ئۆپەراسیۆنەکانیان لە دژی ئەو هێزانە چڕتر بکەنەوە. هەروەها جەختی لەوەش کردەوە کە ئەو هێرشانەی پێشتر کراونەتە سەر هێزەکانی حەشدی شەعبی، لە بنکەکانی ئەمریکا لە ناو خاکی وڵاتانی کەنداو و ئوردنەوە ئەنجام دراون.
لەلایەکی دیکەوە، حزبوڵای لوبنانی ڕایگەیاند کە لە کاردانەوەی "کۆمەڵکوژییەکانی ئیسرائیل و وێرانکردنی ژێرخانی لوبنان"، بەرەبەیانی ئەمڕۆ هێرشێکی مووشەکیی گەورەیان کردووەتە سەر بارەگای وەزارەتی بەرگریی ئیسرائیل لە ناوەندی تەلئەبیب. حزبوڵا دەڵێت ئەم هێرشە لە چوارچێوەی بەرگریکردنە لە گەلی لوبنان و وەڵامدانەوەی ئاوارەکردنی مەدەنییەکانە.