وەزارەتی ناوخۆی عێراق، ڕۆژی سێشەممە (٣١ی ئازار)، هەواڵی ڕفاندنی ڕۆژنامەنووسێکی ئەمریکی لەلایەن چەکدارانی نەناسراو بڵاوکردەوە و ئاماژەی بەوە کرد کە یەکێک لە تۆمەتبارەکان دوای وەرگەڕانی ئۆتۆمبێلی ڕفێنەرەکان، دەستگیرکراوە.
ئاوێنە: وەزارەتی ناوخۆی عێراق لە بەیاننامەیەکی فەرمیدا ڕایگەیاند: ڕۆژنامەنووسێکی بیانی لەلایەن کەسانی نەناسراوەوە ڕفێندرا. دوای ڕاوەدوونان، ئۆتۆمبێلێکی ڕفێنەران لە کاتێکدا هەوڵی هەڵاتنیان دەدا، گەمارۆدرا و وەرگەڕا. هێزە ئەمنییەکان توانییان یەکێک لە تۆمەتبارەکان دەستگیر بکەن و یەکێک لەو ئۆتۆمبێلانەی لە تاوانەکەدا بەکارهاتبوو، دەستی بەسەردا بگرن.
ئەو وەزارەتە هەروەها جەختی لەوە کردەوە کە هەوڵەکان بۆ دۆزینەوەی کەسانی تری تێوەگلاو لەم ڕووداوە و ئازادکردنی ڕۆژنامەنووسە ڕفێندراوەکە بەردەوامە و لێکۆڵینەوەکان بۆ ئاشکراکردنی وردەکارییەکانی ڕووداوەکە دەستیان پێکردووە.
وەزارەتی ناوخۆی عێراق دووبارە جەختی کردەوە کە هیچ هەوڵێک بۆ تێکدانی ئاسایش یان بەئامانجگرتنی میوانە بیانییەکان قبوڵ ناکات و ئاماژەی بەوە کرد کە هێزە ئەمنییەکانی عێراق لە ئامادەباشیدا دەمێننەوە و بە توندی ڕووبەڕووی یاساشکێنان دەبنەوە و ڕادەستی دادگایان دەکەن.
«ڕۆژنامەنووسێکی ئەمریکیی نیشتەجێی ئیتاڵیا»
شایانی باسە کە شیلی کلیستۆن ژنە ڕۆژنامەوان کە ڕفێندراوە ئەمریکییە، بەڵام تەواوی ژیانی لە ئیتاڵیا بەسەر بردووە و بۆ ئاژانسێکی هەواڵی ئیتاڵی کار دەکات، جگە لەوەی وەک ڕۆژنامەنووسی سەربەخۆ (Freelance) لەگەڵ چەندین ماڵپەڕ و ڕۆژنامەی وەک «ئەلمۆنیتەر» کاردەکات دەکات.
باڵیۆزخانەی ویلایەتە یەکگرتووەکان لە بەغدا، لە ڕۆژان و هەفتەکانی ڕابردوودا بەردەوام هۆشداریی ئەمنی بۆ هاوڵاتیانی خۆی لە عێراق دەرکردووە و سەبارەت بە هەڕەشە زیادبووەکان، لەوانە مەترسی ڕفاندن، هۆشداری داوە.
باڵیۆزخانەکە لە بەیاننامەیەکدا ڕوونی کردەوە کە لەم ماوەیەدا هێرش کراوەتە سەر هاوڵاتیانی ئەمریکی و بەرژەوەندییەکانی ویلایەتە یەکگرتووەکان، لەوانە ژێرخانە هەستیارەکان. هەروەها ئاماژە بەوە کراوە کە گرووپە چەکدارەکان کۆمپانیا و دامەزراوەکانی وزەی ئەمریکییان کردووەتە ئامانج و ئەگەری هەیە بەردەوام بن لە هێرشەکانیان.
لە کاتی دەسپێکی جەنگ لە ئێران لە ٢٨ی شوباتەوە، گرووپە چەکدارەکانی هاوپەیمانی ئێران هێرشیان کردووەتە سەر ئەو هوتێلانەی بیانییەکانی تێدا نیشتەجێن و دامەزراوەکانی تری پەیوەست بە ویلایەتە یەکگرتووەکان لە ناوچە جیاجیاکانی عێراق، لەوانە هەرێمی کوردستان.