باڵیۆزخانەی ئەمریکا لە عێراق هۆشداریی بەپەلە دەداتە هاووڵاتییانی و داوایان لێ دەکات بەهۆی هەڕەشە ئەمنییەکان و ئەگەری بۆردوومانکردنی زانکۆ ئەمریکییەکان، دەستبەجێ خاکی عێراق جێبهێڵن.
ئاوێنە: بەگوێرەی ڕاگەیەندراوێکی فەرمیی باڵیۆزخانەی ئەمریکا لە بەغدا، زانیارییان پێگەیشتووە کە ئێران و گرووپە چەکدارەکان بەنیازن زانکۆ ئەمریکییەکان لە شارەکانی بەغدا، سلێمانی و دهۆک بکەنە ئامانج. باڵیۆزخانەکە جەخت دەکاتەوە کە ئەمە مەترسییەکی جددی و ڕاستەقینەیە بۆ سەر گیانی هاووڵاتیانی ئەمریکی لە ناوچەکەدا.
جەنگی نێوان ئەمریکا و ئێران چووەتە قۆناغێکی نوێوە و بنکە سەربازییەکانی ئەمریکا لە ناوچەکەدا بەردەوام دەکرێنە ئامانج. ئەم پەرەسەندنە سەربازییە مەترسیی گەورەی بۆ سەر سەقامگیری و ئاسایشی وڵاتانی ڕۆژهەڵاتی ناوەڕاست دروست کردووە و دۆخەکەی بەرەو ئاڵۆزیی زیاتر بردووە.
بەهۆی داخستنی ئاسمانی عێراق بەڕووی گەشتە ئاسمانییەکاندا، باڵیۆزخانەی ئەمریکا داوا لە هاووڵاتییانی دەکات تەنیا ڕێگە وشکانییەکان بەکاربهێنن. ڕێگەکانی وڵاتی ئوردن، کوەیت، سعودیە و تورکیا وەک تەنیا بژاردە دیاریکراون بۆ جێهێشتنی هەمیشەیی خاکی عێراق و گەڕانەوە بۆ وڵاتەکەیان.
باڵیۆزخانە ئاماژەی بەوە کردووە کە ئاسانکاری بۆ وەرگرتنی ڤیزا لە مەرزەکان دەکرێت تاوەکو گەشتیاران بێ زیان بگەڕێنەوە. هەروەها داوا کراوە هاووڵاتییان لە باڵەخانە و دامەزراوەکانی ئەمریکا دووربکەونەوە، چونکە مەترسیی بەردەوامی هێرشی مووشەکی و درۆن لە ئاسمانی عێراقدا بوونی هەیە.
لە ئێستادا خزمەتگوزارییە گشتییەکان ڕاگیراون، بۆیە باڵیۆزخانە داوا لە هاووڵاتییان دەکات خۆراک و دەرمانی پێویست کۆگا بکەن. هەروەها ڕێنمایی دراوە کە بۆ پاراستنی سەلامەتییان، هەمیشە لە ڕێگەی ئیمەیڵەوە لەگەڵ نوێنەرایەتییەکانی وڵاتەکەیان لە پەیوەندییەکی بەردەوامدا بن.