رۆژنامه‌ی نیویۆرك تایمز بڵاویكرده‌وه، حزبوڵای عێراقی له‌به‌رامبه‌ر ئازادكردنی ئه‌و رۆژنامه‌نوسه ئه‌مریكییه‌ی كه رۆژی سێشه‌ممه‌ی رابردو له به‌غدا رفێندرا، داوای ئازادكردنی ژماره‌یه‌ك له ئه‌ندامه‌كانی حزبه‌كه‌ی له حكومه‌تی عێراق كردوه.
ئاوێنه: شێلی کیتلسۆن، رۆژنامه‌نوسی ئه‌مریكی، رۆژی سێشه‌ممه‌ی رابردو له به‌غدا رفێندرا. رۆژنامه‌ی نیویۆرك تایمز، له‌زاری دو به‌رپرسی ئه‌منیی عێراقییه‌وه بڵاویكردۆته‌وه، رۆژی چوارشەممە نوێنەرانی كه‌تیبه‌كانی حزبوڵا، پەیوەندییان بە بەرپرسانی حکومەتی عێراقەوە کردوە، داوای ئازادکردنی ژماره‌یه‌ك له ئەندامانی میلیشیاكەيان كردوە كە دەستبەسەرکراون، لە بەرامبەر ئازادکردنی کیتلسۆن.
دو به‌رپرسه ئه‌منییه‌كه به رۆژنامه‌كه‌یان وتوه، كه‌تیبه‌كانی حزبوڵا، میلیشیایەکی بەهێزە لە عێراق و لە دەرەوەی کۆنترۆڵی دەوڵەت کاردەکات.
ئه‌وه‌ش له‌كاتێكدایه كه لە مانگی ئازاری ساڵی 2023دا میلیشیاکان ئەلیزابێس تسورکۆڤ، خوێندکاری دکتۆرای زانکۆی برینستۆن و خاوەن رەگەزنامەی ئیسرائیلی و روسییان ڕفاند و زیاتر لە دو ساڵ بە بارمتەیان گرت و لەو ماوەیەدا ئەشکەنجە درا، پاشان ئازادكرا.