وەزارەتی دادی عێراق ئازادکردنی ٥٩٥ بەندکراوی لە مانگی ڕابردوودا ڕاگەیاند.
ئاوێنە: ئەمڕۆ یەکشەمە وەزارەتی دادى عێراق لەراگەیەندراوێکدا ئاشکرایکرد "٥٩٥ زیندانی لەماوەی مانگی ئاداردا ئازادکراون، کە لەنێو زیندانەکانی بەغدا و پارێزگاکانی تردا بەندکرابوون".
ئەوەش هاتووە "لەنێوان ئەو کەسانەی ئازادکراون، ٣٦٩ زیندانی بەپێی بڕیاری جۆراوجۆری دادوەریی ئازادکراون، لەکاتێکدا ٢٢٦ زیندانی تر کە یاسای لێبووردنی گشتی گرتوویانێتییەوە".
وەزارەتی داد ئاماژەی بەوەشداوە، بەڕێوەبەرایەتی چاکسازییی عێراق بەردەوامە لە چاودێریکردن و پەیڕەوکردنی ڕێکارەکانی ئازادکردن لەدوای جێبەجێکردنی سەرجەم مەرجە یاساییەکان.
لەکۆتایی راگەیەندراوەکەدا ئەوەش خراوەتە روو، بەڕێوەبەرایەتی چاکسازییی عێراق پابەندە بە ئەرکی پیشەیی و مرۆیی خۆی لە بەرزترین ئاستی وردبینی و بەرپرسیارێتیدا.