ئاسایشی دهۆک دەنگۆی فرۆشتنی گورچیلەی چەند برایەک بۆ قومارکردن ڕەتدەکاتەوە و دەڵیت "هیچ بنەمایەکی نییە".
ئاوێنە: ماوەی چەند ڕۆژێکە لە تۆڕە کۆمەڵایەتییەکانی سنووری پارێزگای دهۆک، دەنگۆی ئەوە بڵاو بووەتەوە کە گوایە لەناو خێزانێکدا چەند برایەک بۆ پەیداکردنی پارەی قومارکردن، گورچیلەکانی خۆیان فرۆشتووە. لەبەرامبەردا سەرچاوەیەک لە بەڕێوەبەرایەتیی ئاسایشی پارێزگای دهۆک ڕایگەیاند "ئەو دەنگۆیانە دوورن لە ڕاستییەوە و هیچ بنەمایەکی یاسایی و واقیعییان نییە".
ئاسایشی دهۆک وتیشی "ئەو دەنگۆیانەی باس لە بوونی باندی بازرگانیکردن بە ئەندامانی جەستە دەکەن کەلە ناوەڕاست و خوارووی عێراقەوە هاتبێتن، ئامانجی سیاسی و تێکدانی ئارامییان لەپشتە".
"دەزگا ئەمنییەکانی هەرێمی کوردستان بە هەموو توانایەکەوە ڕێگری لە هەر هەوڵ و تاوانێکی لەو شێوەیە دەکەن". ئاسایشی دهۆک وای وت