دەستەی دەستپاکی فیدراڵیی عێراق، دەستگیرکردنی شەش فەرمانبەری لە بازگەیەکی گومرگی نێوان هەولێر و کەرکووک ڕاگەیاند، بەهۆی تێوەگلانیان لە سەرانەسەندن و ڕاگرتنی بەئەنقەستی مامەڵەی هاووڵاتیان.
ئاوێنە: ئەمڕۆ سێشەممە، دەستەی دەستپاکی عێراق ڕایگەیاند، لە هەڵمەتێکی نووسینەی لێکۆڵینەوەی دەستەکەیان لە کەرکووک بە هەماهەنگی لەگەڵ دەزگای ئاسایشی نیشتمانی، بە فەرمانی دادوەر شەش فەرمانبەری بازگەی گومرگی نێوان کەرکووک-هەولێریان دەستگیرکرد.
ڕوونیشیکردەوە کە دەستگرکراوەکان تۆمەتبار بوون بەوەی بە ئەنقەست مامەڵەی هاووڵاتییانیان ڕایی نەکردووە سەرەڕای ئەوەی مامەڵەکانیان تەواو یاسایی و بێ کێشە بوون و لەبەرامبەر تەواوکردنی مامەڵەکاندا داوای سەرانەیان کردووە.
دەستەی دەسپاکی ئاماژەی بەوە کردووە کە تۆمەتبارەکان بەپێی بڕیاری 160ی ساڵی 1983 ڕەوانەی بەردەم دادوەری لێکۆڵینەوەی تایبەتمەند کراون، تاوەکو ڕێکاری یاساییان لەبەرامبەردا بگیرێتەبەر.