هێمن هەورامی، ئەندامی مەکتەبی سیاسی پارتی دیموکراتی کوردستان، لە کۆبوونەوەیەکدا لەگەڵ شاندێکی دیپلۆماسی هۆڵەندا (پێکهاتوو لە جانێت ئەلبێرتا، باڵیۆزی هۆڵەندا لە عێراق و بەرترێل سنوێر، جێگری کونسوڵی گشتی لە هەرێم) ڕایگەیاند کە چیتر هیچ ڕێگرییەکی سیاسی لەبەردەم کاراکردنەوەی پەرلەمانی کوردستاندا نەماوە.
ئاوێنە: هێمن هەورامی ئاماژەی بەوە کرد کە دوای تێپەڕبوونی ۲۰ مانگ بەسەر هەڵبژاردنەکان و ئەنجامدانی دەیان کۆبوونەوەی دووقۆڵی لەگەڵ یەکێتیی نیشتمانیی کوردستان و لایەنەکانی دیکە، هەروەها واژۆکردنی ڕێککەوتنی سیاسی لەسەر بنەمای هاوبەشی و سازان، چیتر هیچ بیانوویەک قبوڵکراو نییە بۆ پەکخستنی پەرلەمان.
ئەو بەرپرسەی پارتی جەختی لەوەش کردەوە کە حزبەکەی خوازیاری دەستپێکردنەوەی دەستبەجێی دانیشتنەکانی پەرلەمانە، و داوای لە سەرجەم ئەو هێزە سیاسییانە کرد کە نوێنەریان لە پەرلەماندا هەیە، بەرپرسیارێتیی یاسایی، نیشتمانی و سیاسیی خۆیان لەم قۆناغەدا هەڵبگرن. هاوکات لە کۆبوونەوەکەدا، شاندی میوان لە دواین پێشهاتەکان و ڕوانگەی فەرمی پارتی لەسەر هاوکێشە سیاسییەکانی هەرێم ئاگادارکرانەوە.