جێگری بەرپرسی نووسینگەی سەرۆک وەزیرانی هەرێمی کوردستان جەخت دەکاتەوە کە کارەبای هیچ هاوبەشێک لەسەر قەرزی کۆنی کارەبا نابڕدرێت، بەڵام داوای لێکردن سوود لە دەرفەتی لێخۆشبوونەکە وەربگرن، چونکە دووبارە نابێتەوە.
ئاوێنە: ئەمڕۆ سێشەممە، عەزیز ئەحمەد، جێگری بەرپرسی نووسینگەی سەرۆک وەزیرانی هەرێمی کوردستان رایگەیاند، تا ئێستا کارەبای هیچ هاوبەشێک لەسەر قەرزی کۆنی کارەبا نەبڕاوە و ڕووش نادات.
لەگەڵ ئەوەشدا داوای لە هاوبەشانی کارەبا کرد کە سوود لەو 50٪ی لێخۆشبوونەی قەرزەکانیان وەربگرن، چونکە دووبارە نابێتەوە.
ئەوەشی خستەڕوو کە تا ئێستا هیچ لێخۆشبوونێکی بەو ڕێژە زۆرە نەکراوە.
عەزیز ئەحمەد ڕاشیگەیاند کە لە سیستمی پرۆژەی ڕووناکیدا بەبێ جیاوازی کارەبای هەر هاوبەشێک دەبڕدرێت کە لە ماوەی 50 ڕۆژدا پارە نەدات و وتیشی: “کارەبای ماڵی وەزیرمان بڕیوە لەسەر ئەوەی پارەی نەداوە”.