بەپێی زانیارییەکانی بانکی ناوەندیی عێراق، قەبارەی یەدەگی دراوی بیانیی وڵات دابەزینێکی بەرچاوی بەخۆیەوە بینوە و لە 109 ملیار دۆلارەوە بۆ 77 ملیار و 500 ملیۆن دۆلار کەم بووەوە، کە تێیدا بڕی 31 ملیار و 500 ملیۆن دۆلاری ڕاکێشراوە و زۆرینەی بۆ دابینکردنی مووچەی مووچەخۆران خەرج کراوە.

ئاوێنە: نزار ناسر، پارێزگاری بانکی ناوەندیی عێراق، لە کۆبوونەوەی لەگەڵ لیژنەی دارایی پەرلەمانی عێراقدا ڕای گەیاند کە ئەم کورتهێنان و دابەزینە ڕاستەوخۆ پەیوەندی بە کاریگەرییەکانی داخستنی گەرووی هورمز و پەرەسەندنی گرژییە سەربازییەکانی نێوان ئەمریکا و ئێرانەوە هەیە، کە قەیرانی ئابووریی وڵاتی خستووەتە قۆناغێکی سەختەوە. لەگەڵ ئەوەشدا، جەختی لەوە کردەوە کە بانکی ناوەندی بە هەموو توانایەوە هەوڵ دەدات سەقامگیریی ئابووری بپارێزێت و بەڕێوەبردنی تەندروستیانەی نەختینەی وڵات بۆ بەردەوامیدان بە دابەشکردنی مووچە مسۆگەر بکات.

لای خۆیەوە، مەزهەر محەمەد ساڵح، ڕاوێژکاری ئابووریی سەرۆک وەزیرانی عێراقی فیدراڵ، ئاماژەی بەوە دا کە بۆ دابینکردنی مووچەی سەرجەم مووچەخۆرانی عێراق و هەرێمی کوردستان، مانگانە پێویست بە 8 تریلیۆن دینار دەکات و بژێوی نزیکەی 10 ملیۆن مووچەخۆر لەسەر ئەو پارەیە بەستراوەتەوە.

پێشتر وتەبێژی حکوومەتی عێراقیش ڕەوشەکەی بە "قەیرانی دارایی سەخت" وسف کردبوو و ڕوونی کردبووەوە کە حکوومەت بۆ دابینکردنی مووچە و خەرجییە گشتییەکان مانگانە پێویستی بە نزیکەی 10 تریلیۆن دینار هەیە، لە کاتێکدا داهاتی نەوتی وڵات تەنیا لە دوو تریلیۆن و 500 ملیار دینار زیاترە. ئەم جیاوازییە گەورەی نێوان داهات و خەرجییەکان، کاریگەریی ڕاستەوخۆی کردووەتە سەر خشتەی کاتیی دابەشکردنی مووچە و بووەتە هۆی دواکەوتن و ناڕێکی لە پێدانی مووچەکاندا وەک ئەوەی پێشتر ڕێکخرابوو.