ئەمڕۆ چوارشەممە، فایەق زێدان، سەرۆکی ئەنجومەنی باڵای دادوەریی عێراق پێشوازی لە جۆشوا هاریس، بەرپرسی کاروباری ئەمریکا لە عێراق کرد. لە کۆبوونەوەکەدا، هەردوولا تاوتوێی رێکارە دادوەری و یاساییەکانی قۆناغی دوای کۆتاییهاتنی ئەرکی هاوپەیمانی نێودەوڵەتییان لە عێراق کرد، کە بڕیارە لە ٣٠ی ئەیلوولی ئەمساڵدا جێبەجێ بکرێت.
ئاوێنە: بەپێی راگەیەندراوی ئەنجومەنی باڵای دادوەری، لە دیدارەکەدا تیشک خراوەتە سەر ئەو رێوشوێنە یاسایی و دادوەرییانەی دەسەپێنرێن بەسەر ئەو گروپ و لایەنانەی کە لە دوای وادەی دیاریکراوەوە بەردەوام دەبن لە هەڵگرتنی چەک و ئامادە نین چەکەکانیان رادەستی دەوڵەت بکەن.
لەلایەکی دیکەوە، حەیدەر عەبوودی، وتەبێژی حکومەتی عێراق لەبارەی ئەم دۆسیەیەوە رایگەیاند، دەستبەسەرداگرتنی چەکی بێمۆڵەت و چەسپاندنی سەروەریی یاسا، خاڵی سەرەکی و روونی کارنامەی حکومەتە، هاوکات سەرۆک وەزیرانیش لە میانەی سەردانەکەیدا بۆ واشنتن ئەم پابەندییەی دووپات کردووەتەوە.
وتەبێژی حکومەتی عێراق ئاماژەی بەوەش کرد، لەگەڵ گەیشتن بە وادەی ٣٠ی ئەیلوول، ئەو هۆکارانەی ببوونە پاساو بۆ دروستبوونی کوتلە چەکدارەکان لە نێوخۆی وڵاتدا کۆتاییان دێت. ناوبراو رێوشوێنەکانی کۆنترۆڵکردنی چەکی وەک "گەڕانەوەیەکی سروشتی بۆ دەسەڵاتی دەوڵەتی دەستووری" پێناسە کرد و جەختی لەوە کردەوە کە دەسەڵات دەبێت تەنها لە دەستی دەوڵەت و دامەزراوە فەرمییەکانیدا بێت. هەروەها روونیکردەوە کە لە ئێستادا حکومەت لە گفتوگۆی ئەرێنیدایە لەگەڵ فراکسیۆنەکان بۆ داڕشتنی میکانیزمێکی جێبەجێکار بە مەبەستی سنووردارکردنی چەک، و پێشبینی دەکرێت پێش هاتنی ٣٠ی ئەیلوول لەسەر ئەم پرسە بگەنە رێککەوتنی کۆتایی.
لە چوارچێوەی هەوڵە سیاسی و ئەمنییەکاندا، عەلی زەیدی، سەرۆک وەزیرانی عێراق، لە ئێستادا راستەوخۆ سەرپەرشتیی دانوستانەکان دەکات لەگەڵ پێنج گروپی چەکدار کە پێکهاتوون لە: (نووجەبا، کەتائیبی سەیدولشوهەدا، کەتائیبی حزبوڵای عێراقی، سەرایا ئەولیا دەم و ئەسحابولکەهف) بە مەبەستی رادەستکردنی چەکەکانیان بە حکومەت.
ئەم جووڵانە لە کاتێکدایە کە پێشتر سێ لە گەورەترین کوتلە چەکدارەکانی عێراق، کە بریتی بوون لە لیواکانی سەرایا سەلام بە سەرۆکایەتی موقتەدا سەدر، عەسائیب ئەهلی حەق، و لیواکانی ئیمام عەلی بە سەرۆکایەتی شیبل ئەلزەیدی، چەکەکانیان رادەستی دەوڵەت کردووە و بە فەرمی تێکەڵبوونی خۆیان لە کایەی مەدەنی و سیاسیدا راگەیاندووە.