عەلی زەیدی سەرۆكی ئەنجوومەنی وەزیران و فەرماندەی گشتیی هێزە چەكدارەكانی عێراق، لە كوشتنی فەرماندەكەی پۆلیسی بەغدا هاتە دەنگ و وتی، "حكوومەت لە كۆششەكانی بۆ سەپاندنی یاسا پاشگەز نابێتەوە".
ئاوێنە: ئەمڕۆ پێنجشەممە 27ی ئاب، عەلی زەیدی راگەیەنراوێكی بڵاو كردووەتەوە، تێیدا سەرەخۆشی دەكات بۆ كوژرانی عەمید هيشام محەمەد تەلاع بەڕێوەبەری پۆلیسی ئەمانەی بەغدا و خالید لەفتە كە پۆلیس بوو لەگەڵ فەرماندەكەی، لە كاتی لابردنی زێدەڕۆییەكانی ناوچەی دۆرەی بەغدا كوژران، ئەمە دوای ئەوە گرژیی لەگەڵ خەڵكی ناوچەكە دروست بووبوو.
زەیدی لە راگەیەنراوەكەیدا دەڵێ، "بە دوای هەر كەسێكەوە دەبین یاری بە ئاسایشی نیشتمان و هاووڵاتییان بكات، بەرپەرچی هەر كەسێك دەدەینەوە هێرش بكاتە سەر موڵك و سامانی دەوڵەت".
هەروەها دووپاتی دەكاتەوە كە فەرمانی بە هێزە ئەمنییەکان كردووە، بۆ ئەوەی رێكارییەكان توند بكەن و ئابڵۆقەی ناوچەی رووداوەكە بدەن، ئەو كەسانە دەستگیر بکەن كە دەستیان لە تاوانەكەدا هەبووە.