نوسینگه‌ی عه‌لی زه‌یدی، فه‌رمانده‌ی گشتی هێزه چه‌كداره‌كانی عێراق پێشوازی له وه‌فدێكی باڵای ئه‌منی و سه‌ربازیی سعودیه كردو له كۆبونه‌وه‌یه‌كدا تاوتوێی هه‌ماهه‌نگی بۆ كۆنترۆڵكردنی سنوره هاوبه‌شه‌كان و هاریكاریی هه‌واڵگریی نێوان هه‌ردو وڵات ده‌كه‌ن.
ئاوێنه: شانه‌ی راگه‌یاندنی ئه‌منیی عێراق، ئێواره‌ی ئەمڕۆ پێنجشەممە له راگه‌یه‌ندراوێكدا وتی، نوسینگەی فەرماندەی گشتیی هێزە چەکدارەکانی عێراق پێشوازی لە وه‌فدێکی باڵای ئەمنیی و سەربازیی سعودیە کردو کۆبونەوەیەکی بەرفراوانیان ئەنجامدا بە ئامادەبونی فەریق یەکەمی روکن عەبدولئەمیر شەمەری بەڕێوەبەری نوسینگەی فەرماندەی گشتی و سەرۆکی دەزگای هەواڵگریی نیشتمانیی عێراق، لەگەڵ بریکار و بەڕێوەبەرانی دەزگا ئەمنی و هەواڵگرییەکان.
به‌پێی راگه‌یه‌ندراوه‌كه، ئەم کۆبونەوەیە وه‌ك تەواوکارییەک بوه بۆ گفتوگۆ و دانوستانەکانی پێشوتر كه له ریازی پایته‌ختی سعودیه به‌ڕێوه‌چون له‌گه‌ڵ بەردەوامیدان بە هەماهەنگییە ئەمنییە بەردەوامەکانی نێوان عێراق و سعودیە، "بەوپێیەی گفتوگۆکان سەرنجیان خستبوە سەر بەهێزکردنی ڕێکارەکانی کۆنترۆڵکردنی سنورە هاوبەشەکان و چڕکردنەوەی ئاڵوگۆڕی زانیاریی دەزگا هەواڵگرییەکان، بە شێوەیەک کە بەشدار بێت لە بەرزکردنەوەی ئاستی هاوکاریی دوقۆڵی."
وه‌ك له راگه‌یه‌ندراوه‌كه‌دا هاتوه، ئامادەبوانی کۆبونەوەکە جەختیان لە پەرۆشیی دولایەنە کردەوە بۆ چەسپاندنی میکانیزمەکانی کاری ئەمنی و پەرەپێدانیان، بە جۆرێک کە کاریگەریی ئەرێنی لەسەر ئاسایش و سەقامگیریی هەردو وڵات هەبێت.