بانكی ناوه‌ندیی عێراق بڕیاریدا به راگرتن و قەدەغەکردنی مامەڵەکردن بە باڵانس، سپاردە و هەژمارەكانی 33 کەسایەتی و کۆمپانیای ناوخۆیی، هاوکات سزای توندی بۆ ئەو لایەنانە دەستنیشان کردوە کە سەرپێچی لە بڕیارەکە دەکەن.
ئاوێنه: فه‌رمانگه‌ی یاسایی بانکی ناوەندیی عێراق له نوسراوێكی ره‌سمیدا رایگه‌یاندوه، بەپشتبەستن بەو دەسەڵاتانەی پێیاندراون و بەپێی ماددەی (٤٠) لە یاسای بانکی ناوەندیی عێراق ژمارە (٥٦)ی ساڵی ٢٠٠٤و لەپێناو بەرژەوەندیی گشتیدا، بڕیاردرا بە ڕێگەنەدان بە سەرجەم بانکە مۆڵەتپێدراوەکان و دامەزراوە داراییە نابانکییەکان بۆ مامەڵەکردن لەگەڵ 33 كه‌سایه‌تی و كۆمپانیا كه له بڕیاره‌كه‌دا ناویان هاتوه.
لیستی قەدەغەکردن و سڕکردنەکە (١٤) کەس و (١٩) کۆمپانیای بازرگانی و ناوخۆیی له‌خۆگرتوه.
بانکی ناوەندی جەختی کردەوە کە بڕیاری سڕکردن و قەدەغەکردنی مامەڵەکردن له‌گه‌ڵ ئه‌و كه‌سایه‌تی و كۆمپانیایانه تا كاتێكی نادیار بەردەوام دەبێت و وتوشیه‌تی، هەر لایەنێکی دارایی سەرپێچی لەم ڕێنماییانە بکات، بەرپرسیارێتیی تەواوی یاسایی دەکەوێتە ئەستۆ.
