بڕیارە لە ئایندەیەکی نزیکدا، ڕێککەوتنی نێوان حکومەتی عێراق و کۆماری تورکیا سەبارەت بە دروستکردنی دەروازەیەکی نوێی سنووری لە ناوچەی فیشخابوور بچێتە قۆناغی جێبەجێکردنەوە. پڕۆژەکە لە ڕێگەی قەزای تەلەعفەرەوە دەبەسترێتەوە و بەپێی ئەو یاداشتەی لەنێوان هەردوو وڵاتدا واژۆ کراوە، ئامانج لێی پشتگیریکردنە لە پڕۆژەکانی ژێرخان، گەشەپێدان و پرۆسەی ئاوەدانکردنەوە لە سنووری پارێزگای موسڵ.
ئاوێنە: لە لێدوانێکدا بۆ ڕۆژنامەی فەرمی، محەممەد ئەهریس، ئەندامی ئەنجومەنی پارێزگای موسڵ ڕایگەیاند: کردنەوەی ئەم دەروازە سنوورییە وەرچەرخانێکی گرنگ دەبێت لە زیادکردنی قەبارەی هەناردە و هاوردە و بەرزکردنەوەی داهاتە داراییەکانی عێراق. ناوبراو ئاماژەی بەوەش کردووە کە پڕۆژەکە وەک سەرچاوەیەکی نوێ بۆ جووڵەی کاڵا و ئاڵوگۆڕی بازرگانی کار دەکات، هاوکات دەبێتە پشتیوانێک بۆ دەروازەی سنووریی ڕەبیعە و پێگەی نەینەوا وەک ناوەندێکی سەرەکی بازرگانی لەنێوان عێراق و تورکیادا بەهێزتر دەکات.
ئەو ئەندامەی ئەنجومەنی پارێزگای نەینەوا ئەوەشی خستەڕوو کە گرێدانی ئەم دەروازە نوێیە بە پڕۆژەی ستراتیژیی «ڕێگەی گەشەپێدان»، پێگەی ئابووری و جیۆپۆلەتیکی عێراق بەهێز دەکات. ئەم هەنگاوە دەرگای فراوان لەبەردەم کەرتی گواستنەوە و ڕاکێشانی وەبەرهێنان دەکاتەوە، لە پاڵ ئەوەشدا دەرفەتی کار بۆ هاووڵاتییان دەڕەخسێنێت و بزوێنەری کەرتە جیاوازەکانی دیکەی ئابووری دەبێت.
لە کۆتایی لێدوانەکەیدا، ئەهریس باسی لەوە کرد کە ئەم پڕۆژەیە بەشێکی بنەڕەتییە لە هاوکارییە ئابوورییەکانی نێوان بەغدا و ئەنقەرە و هاوتەریبە لەگەڵ سیاسەتی فراوانکردن و بەهێزکردنی دەروازە سنوورییەکان و پەرەپێدانی تۆڕەکانی گواستنەوە، بە جۆرێک کە کارئاسانی دەکات بۆ گۆڕینی عێراق بۆ ڕێڕەوێکی سەرەکی و ستراتیژیی بازرگانی لەسەر ئاستی ناوچەکە و جیهاندا.