وەزارەتی دارایی عێراق ڕایگەیاند، ڕۆژی شەممە ٢٤ی تشرینی یەکەمی ٢٠٢٦، وەک وادەی دەستپێکردنی وەرگرتنی داواکارییەکان بۆ پێدانی پێشینەکانی بانکی ڕافیدەین لە ڕێگەی ئەپڵیکەیشنی "سوپەر کی"یەوە دیاری کراوە.
ئاوێنە: بەپێی ڕاگەیەندراوێکی وەزارەتەکە، بانکی ڕافیدەین سەرجەم ڕێکارە هونەرییەکان و بەستنەوەی ئەلیکترۆنی تایبەت بە خزمەتگوزاریی پێشینەکانی لە ڕێگەی ئەپڵیکەیشنی ناوبراوەوە تەواو کردووە. بڕیارە سبەینێ شەممە، لینکی پێشکەشکردن لە ڕێگەی ئایکۆنی بانکەکەوە کارا بکرێت. خزمەتگوزارییەکەش سەرجەم فەرمانبەرانی مەدەنی، سەربازی و خانەنشینان دەگرێتەوە، بەو مەرجەی مووچەکانیان لە بانکی ڕافیدەین جێگیر کرابێت (تەوتین کرابێت) و هەڵگری کارتی بانکەکە بن.
لە ڕاگەیەندراوەکەدا هاتووە، پرۆسەی پێشکەشکردنەکە سنووردارە و بۆ هەر وەجبەیەک تەنیا ڕێگە بە پێشکەشکردنی پێنج هەزار داواکاری دەدرێت. دوای تەواوبوونی ئەو ژمارەیە، لینکەکە بە شێوەیەکی کاتی دادەخرێت، بۆ ئەوەی کارمەندانی بانکەکە بتوانن ڕێکارە کارگێڕییەکان، پێداچوونەوە و بەدواداچوونی بانکی بۆ مامەڵەکان ئەنجام بدەن. پاشان بڕی پارەی پێشینەکان بەشێوەی یەک لەدوای یەک و ڕۆژانە دەخرێتە سەر هەژماری ئەو پێشکەشکارانەی کە ڕێکارەکانیان بە سەرکەوتوویی تەواو بووە و مەرجەکانیان تێدایە.
وەزارەتی دارایی ڕوونیشی کردووەتەوە، دوای تەواوبوونی مامەڵەی داواکارییەکانی وەجبەی یەکەم، لینکەکە جارێکی دیکە بۆ وەرگرتنی پێنج هەزار داواکاریی نوێ دەکرێتەوە و پرۆسەکە بە هەمان میکانیزم و قۆناغ بە قۆناغ بەردەوام دەبێت.
لەلای خۆیەوە، بانکی ڕافیدەین جەختی لەوە کردووەتەوە کە داخرانی کاتیی لینکەکە تەنیا ڕێکارێکی ڕێکخستنە بۆ تەواوکردنی مامەڵەکان، و بە واتای وەستانی خزمەتگوزارییەکە یان کۆتاییهاتنی دەرفەتی پێشکەشکردن نایەت.
لە کۆتاییدا، بانکەکە هۆشداری داوەتە کڕیارانی کە تەنیا پشت بە کەناڵە فەرمییەکانی بانک ببەستن بۆ پێشکەشکردن و وەڵامی ئەو کەسانە نەدەنەوە کە بانگەشەی ئەوە دەکەن دەتوانن بەرامبەر بە بڕێک پارە گرەنتی وەرگرتنی پێشینەکەیان بۆ بکەن یان ڕێکارەکانیان بۆ خێرا بکەن. بانکەکە دووپاتی کردەوە کە سەرجەم داواکارییەکان تەنیا لە ڕێگەی ڕێڕەوی ئەلیکترۆنیی پەسەندکراو و بەپێی ڕێنماییەکان جێبەجێ دەکرێن.